Chief Minister Pu Lal Thanhawla chuan kumin HSLC leh HSSLC exam-a Lungleia Mizo zirlai tithate chawimawina hun Mizoram Zirlai Pawl (MZP): Headquarters Lunglei in Saikuti Hall-a a buatsaih chu a hmanpui. Chief Minister hi Pi Lal Riliani, Indian Society on Tobacco and Health: Mizoram Chapter President leh Pu Joseph Lalhimpuia, MYC Chairman bakah Lunglei DC Dr. Ankita Chakravarty leh SP C. Lalthanmawia ten an tawiawm a ni.

Chief Minister chuan Chief Minister chuan zirlai tithate chawimawina hun buatsaih a ni chu lawmawm tiin, vawiina chawimawna dawngtute pawhin tun an hlawhtlinna hmuh chu duhtawk mai lova, phur leh zual zawka an kalna tura infuihna ah ngaiin, thahnemngai taka tum mumal tak nei chunga kal zel turin a chah a ni. Mizoramin economy innghahna tur tha human resource potential tha tak a neih thu sawrkarin hria in, kawng hrang hrangah pawh hma lak a nih thu Chief Minister chuan a sawi a. Quality Education nei tura hmalak a nih thu te, MYC kaltlangin Coaching leh Skill Development programme dangte kalpui a nih thu te leh, eizawnna innghahnatlak leh hlawk zawk, mahni tui zawng leh remhriatna hmanga hnathawhna opportunity Entrepeneurship Development Scheme kaltlanga siam a nih thu te a tarlang a. Central Service examination leh Army lamahte Mizo thalai thahnem zawk an luh a tul a ti a. Chhingchhip a Sainik School, India rama hmeichhia luh ve theihna hmasa ber Mizoramin a neih chu ngaihven nachang hretu tam se a ti bawk. 

Chief Minister chuan tunlaiah ruihhlo in thalaite nun a tihchhiat nasat thu leh sawrkar pawhin a do turin kawng hrang hrang dap in hma a lak thu a sawi a. A hlawhtlinna tak tak erawh tan hona leh mahni mimal nun uluk naah a innghat a ni, a ti. Zirlaite chu ram future an ni a, ram innghahna tlak annih dawn chuan nu leh pa thuawih leh aiai upa zah nachang te leh zirtirtute zah nachang an hriat a, an nun an uluk chuan tuna thalaite hian Zoram thar an siam theih tur thu Chief Minister chuan a sawi. Sawrkarin ram hmasawnna turin kawng hrang hrang ngaihtuahin, South-east Asia ramte nena insumdawntawnna tichak tura Kaladan Multi Modal Project buaipui mek chu chak taka kalpui a nih thu a sawi a. Mizoram chhim lam chu kawtchhuah pawimawh tak a nih leh tur thu sawiin, he insimdawntawnna tura hmalakna hian kawng hrang hrangah thalaite tan job opportunity a inhawn tur leh, Mizorama chengte ngeiin chu opportunity chu an hman tangkai theih nan tun atanga thalai an lo inpuahchah a ngaih thu a sawi a. Chung zawng zawng atan chuan nun uluk a, nu leh pa thuawih leh hriselna kawng zawha zuk leh hmuam leh ruihhlo laka fihlim a pawimawh thu a sawi. Chief Minister chuan thufingin "mahni intanpui nachang hria te hi Pathianin a tanpuina thin' a tih ang deuhin midang puih chauh ngaihchang lova, mahni in hmalak tum a, tumruhna leh ram hmangaihna nen thalaite chu nun uluk tak chunga Pathian tihna nen kal zel turin zirlaite chu a chah a ni.

Mizo zirlai titha chawimawi te hi Lunglei Town area huamchhunga zirna in atanga exam, HSLC leh HSSLC exam distinction a pass chinte niin, mi 120 vel chawimawna pek an ni a. Anni bakah hian Special Award buatsaih niin, HSLC exam pass thar Specially Abled zirlai Lalruatsaka leh HSLC exam a pahnihna Lalrintluanga te hnenah lawmpuina hi hlan a ni. Chief Minister hian Lalruatsaka pa Pu Lalrengpuia, Lunglawn hnenah a eizawnna tur Autorickshaw a pe bawk.

Vawiin programme-ah hi Pu K. Lalremruata, Vice President, MZP Lunglei Hqrs. chuan kaihruaiin an President Pu Lalrammuanawma leh MZP General Hqrs. President Pu L. Ramdinliana Renthlei ten thu an sawi bawk a ni.