India Vice President Pu M.Venkaiah Naidu chuan vawiin khan Mizoram lo tlawhin Mizoram University Campus, Tanhril-a sak zawh thar ‘Academic & Seminar Complex’ a rawn hawng a, hemi rual hian UGC leh NEC bultuma Boys & Girls Hostel sakna tur lungphum a phum nghal bawk.

Vice President Pu M.Venkaiah Naidu hi Lengpui Airport-ah a tum hmasa ber a, hetah hian Commerce & Industries Minister Pu H.Rohluna hovin state officials pawimawh engemawzatin an lo hmuak a. MZU hmunah chuan Vice President Pu Naidu hi Mizoram Governor Lt.Gen.Nirbhay Sharma, PVSM, UYSM, AVSM, VSM (Rtd), Mizoram Finance & Planning Minister Pu Lalsawta bakah Mizoram Chief Secretary Pu Arvind Ray, DGP Pu Balaji Srivastava leh state officials pawimawh dangten an tawiawm a ni.

MZU Academic & Seminar Complex hawnna inkhawm MZU Auditorium-a neihah Mizoram University Vice Chancellor Prof.K.R.S.Simbasiva Rao chuan kum 2000-a MZU bultan a nih dan leh a tun dinhmun chungchang a tarlang a. India-a University zawng zawng zingah MZU chiahah hian kum 20 chhungin vawi khatmah student agitation a la awm ngai lo a ni, a ti. Ramchhung University hrang hrangte zingah Mizoram University chu 81-na hmun a hauh mek a, he University tihchangtlun nan Medical College leh Hospital an dil thu sawiin Vice Chancellor Prof.Rao chuan Mizoram-ah Health Sector tihchangtlun a ngai a, a bik takin Cancer leh HIV enkawlna tha mamawh a nih thu a tarlang.

Khuallian India Vice President Pu M.Venkaiah Naidu chuan thu sawiin Mizoram-ah zirna tha zawk nei tur chuan infrastructure tha neih a pawimawh em em a, chuvangin vawiinah Academic & Seminar Complex building thar a rawn hawng thei chu a lawm hle a ni, a ti. Mizoram chu state ralmuang berte zinga mi a nih angin hmasawnna pawh nasa takin a thleng mek a, Mizo mipuite pawh ziak leh chhiar thiamnaah an sang ang bawkin hmasawnna lamah pawh an pen chak hle a ni, a ti. Khawvel pumah India-ah chiah hian ramchhunga cheng mipui zinga zaa 65% chu kum 35 hnuai lam an ni a, mithiam ten an chhut danah chuan kum 2030-ah phei chuan India chuan ‘surplus talent’ nei awmchhun ram a nih hial an ring a; chuvangin vawiina zirlai thalaiten an zirna lamah pawh degree hrang hrang bakah chhawr theiha an thiamnate an tihhriam a ngai chho zel dawn a ni, a ti. Mizoram University chu hun reilote chhungin hmingthatna a chher mek a, Mizoram tan mai ni lovin North East Region bakah ASEAN ramte atanga zirlai tam thei ang ber hip thei tura tan la turin a fuih bawk. Rampumah faina lama beihpui thlak mek ‘Swacch Bharat’ ah Mizoram chu a titha ber state te zinga mi a ni chu a lawmawm hle a; faina chuan hriselna a rawn keng tel ang a, mihring hriselte chu an taihmak thin avangin ram leh hnam hmasawnna atan thawk thei tur mi an pung dawn a ni, a ti.

Vice President Pu Naidu chuan Mizoram leilung, thing leh mau, boruak, sik leh sa te chu duhthusama mawi leh nuam a ni a, environment humhalh hi a pawimawh a, chumi rual chuan mahni hnam ziarang leh hnam tawng humhalh  a pawimawh hle bawk a ni tiin zirlai kalkhawmte a hrilh a. Mizoram-ah chuan horticulture, floriculture leh food processing lamah hmalak tam a, entrepreneurship lam pawh thalaiten an awn tan ve a ngai tawh a; tunlai khawvelah IT tel lovin engmah a tihtheih tawh loh avangin digital lamah pawh tan la sauh sauh turin zirlaite a fuih bawk. MZU VC Prof. Rao-in University dilna leh mamawh hrang hrang a hnena a thlente chu theihtawpa a bawhzui tur thu a sawi bawk.

Mizoram Governor Pu Nirbhay Sharma pawhin thu sawiin tuna India Vice President ni mek Pu M.Venkaiah Naidu taihmakna a fak a, state 2 tih loh chu ramchhung state dangte a tlawh kim vek tawh thu a tarlang a. Governor chuan Mizoram ziak leh chhiar thiam 93% a nih laiin hnathawk zat (employment) erawh 24% vel chauh a ni thung a, hemi avang hian zirna kalpui a nih dan hi thlirnawn a pawimawh hlea a hriat thu a sawi a. Mizo zirlaite chu mahni tawng bakah tawng dang, a bik takin Hindi, thiam tel ngei ngei turin a chah bawk.

Academic & Seminar Complex hawnna inkhawm hi MZU Registrar Pu Zothankhuma’n lawmthu sawiin a khar a. Vice President Pu M.Venkaiah Naidu chuan ama puala MZU hmunah Mizoram hnam thil hrang hrang phochhuahna ‘cultural exhibition’ an buatsaih sak chu a en nghal a. MZU atangin Thuampui helipad panin vawiin chawhnu vek khan Aizawl a chhuahsan nghal a ni.

Academic & Seminar Complex hawnna inkhawm hi MZU Registrar Pu Zothankhuma’n lawmthu sawiin a khar a. Vice President Pu M.Venkaiah Naidu chuan ama puala MZU hmunah Mizoram hnam thil hrang hrang phochhuahna ‘cultural exhibition’ an buatsaih sak chu a en nghal a. MZU atangin Thuampui helipad panin vawiin chawhnu vek khan Aizawl a chhuahsan nghal a ni. Thuampui helipad-ah hian Mizoram Governor, Finance Minister, Mizoram Chief Secretary, Mizoram DGP leh state officials pawimawh dangte bakah Central YMA, Mizo Hmeichhia Insuihkhawm Pawl, Mizoram Kohhran Hruaitute Committee leh Mizoram Upa Pawl hruaituten Vice President hi lo chibaiin an thlah a ni.