1649/2024-2025

Dated Aizawl, the 19th August, 2024: Vawiin khan High Powered Committee Lunglei te chu an Chairman Pu Lalduhoma, Chief Minister hovin a office ah an thukhawm.

Chief Minister chuan, sawrkarna kan kalpui hnu deuh lawkah MP election Model Code of Conduct te a han awm leh a, kan tum angin HPC kan thukhawm hma thei ta lo va. Vawiinah Aizawl lamah kan han tan anga, nakinah chuan Lunglei lamah te kan la thukhawm zel dawn a ni. Lunglei mipuiten min duhsakzia kan hria a, mitin kan hmu a. Sawrkar hian mipuite lakah rulh tur tha ba tam tak kan nei tih hi kan hrereng a ni, a ti.

Meeting-ah hian HPC dan ang taka kalpui dan tura hmalak an rel bakah Lungleia Multi Level Car & Smart Parking leh Ring Road project siam an rel a. HPC Fund hman dan phung pawh tlem tihdanglam an rel a ni. Heng bakah hian Serkawn Bazar Shed thar sak chungchang te, Agricultural link road laih chungchang te, Mizoram chhim lama Airport siam chungchang leh thil pawimawh dang te an sawi bawk.

He meeting-ah hian Vice Chairman Pu V. Malsawmtluanga MLA leh HPC member te Pu Lalramliana Papuia, MLA, Pu T. Lalhlimpuia, MLA, Pu R. Lalthazuala, MCS, Member Secretary & Lunglei DC leh non-official member te an tel tha hle a ni.