1061/2026-2027

Aizawl the 18th June 2026: Vawiin khan Chief Minister Pu Lalduhoma kaihhruaiin Mizoram Pro-Active Governance and Timely Implementation (Mi-PRAGATI) meeting vawi thumna CM Conference Hall-ah neih a ni.

Mi-PRAGATI hi state chhunga hmasawnna hnathawh lian zualte vil a, harsatna an tawhte chin fel dan dappuitu leh a tul anga department hrang hrang thawhhona tichak tura din a ni a. Sorkar hnathawhte langtlang leh rang zawka kalpui zel dan ngaihtuahtu committee thunei tak a ni.

Vawiin meetingah hian:

NABARD RIDF sum hmanga Mizoram sorkar hnathawh mek, Project amount Rs. 3 Crore aia tam chin project 53 te ennawnna (review) neih a ni a. An zinga hna kal muang zualte kal muan chhan tarlan a ni a. Chak zawka hnathawh dan tur pawh sawi a ni.

Rs. 44,800 Crore vel senga thawh tur Sairang - Hmawngbuchhuah rel kawng ruahmanna Railways lamin an sawifiah a. He rel kawng hi kilometer 224 vela thui, station 20 awm tura duan a ni. Thenzawl Rel Station awmna tura riruan tawh chu Thenzawl khua atanga a hlat deuh avangin Chief Minister hian hnai deuh zawka dah dan zawng turin a lo hrilh tawh a. Vawiin hian hnai deuh zawka dah an tum dan an tarlang a ni.

Ropuiliani Tribal Freedom Fighter Museum sak mek chungchang te, State Tribal Institute sak mek te, PM SHRI hmalakna kal mek te, Swachh Bharat hmalakna te, Kaladan Multi Modal Transit Transport Project hmalakna te, PWD hnuaia hnathawh lian zualho, hnathawh timuang thei harsatna an tawh mekte leh project kalpui lai han enzui ngai bikte an sawiho bawk a. An harsatnate chinfel dan tur an sawiho nghal zel bawk.

Meeting-ah hian Pu K. Sapdanga, Home Minister, Pu Lalthansanga, EF & CC Minister, Pu B. Lalchhanzova, FCS & CA Minister, Prof Lalnilawma, PHE Minister bakah Chief Secretary Pu Khilli Ram Meena leh official pawimawh te, Mizoram chhunga project lian thawktu central agency te an tel a. Online-in Ministry of External Affairs aiawh te, NHIDCL Managing Director te, district Bawrhsap ten an zawm bawk.