1060/2026-2027

Aizawl, the 18th June, 2026: Mizoram Larsap, General (Dr) Vijay Kumar Singh, PVSM, AVSM, YSM (Retd) chuan vawiin khan St. Paul's Higher Secondary School, Montfort Hills, Tlangnuam, Aizawlin kum 2026-2027 chhunga zirlai hruaitu tur House Captain thlan thar 20 te lakluhna "Investiture Ceremony 2026" a buatsaih chu Khuallian niin a hmanpui. Larsap hian house hrang hrang 5 - Louise House, Montfort House, Gabriel House, Francis House leh Abraham House hruaitu thlan tharte badge a bel sak bakah house flag a hlana, fuihna thu a sawi bawk.

Larsap General (Dr) Vijay Kumar Singh chuan hruaitu thlan tharte duhsakna hlanin, anmahni thlanga an chunga rinna nghattute beiseina tihpuiltling turin taimakna, thuhnuairawlhna leh inpekna nena hna thawk turin a fuih a. Hruaitu dik tak nihna chu midangte hnena thu pekah nilo, rawngbawl sakah a innghat zawk a, hruaitu tha chuan ngun taka ngaithlain thil nih dan a hre thiam zung zung a, entawntlak taka nungin mite a hneh thin a ni, a ti. Midangte nena intawiawm tawn tura fuihin, hruaitu dinhmun chu hamthatna dawnah ni lovin midang tana pek tamah teh thin a ni, a ti a. Zirna ngawr ngawrah insawrbing lova mihring puitling chher chhuah kawnga St. Paul's Higher Secondary School hmalakna fakawm a tih thu sawiin, zirna chuan eizawnna kawnga hlawhtling tura thalaite a hrual mai piah lamah khua leh tui tha ni tura a chher hriam tel a ngaih thu a sawi a. Kan ramin thalai rinawm leh chhawrtlak, khawtlang hmasawn nana thahnemngai a mamawh thu a sawi bawk.

Larsap chuan Investiture Ceremony chu hruaitu nihna dinhmun mai bakah a kentel mawhphurhna leh midangin rinna an nghahte hlen chhuak tura bultanna a nih thu a sawi a. Zirlaite chu an nun uluk tur leh zirlai an nih chhunga hmasawn tura inzir nasa tura fuihin, tuna in thil zir leh hriatte hian in dam chhung a awh tawh dawn bakah khawtlang leh ram tana in theihna lan chhuah thlengin a pui dawn che u a ni, a ti. Thiamna sang zel leh chanchin inhriatpawh tawn zung zung theihna khawvela cheng mek an nih avangin zirlaite chu insiamrem thiam turte, inzir peih tur leh chhia leh tha hriatnate fimkhur taka hmang thin turin a chah a. Investiture ceremony hmang tura sawm a ni chu lawmawm tiin, programme felfai a tih thu leh entawntlak a tih thu a sawi a. Zirlaiteah beiseina sang tak a neih thu pawh sawiin, an kalzelna tura duhsakna a hlan a ni.

He hunah hian Brother Kuriyan M.S., Principal, St. Paul's Higher Secondary School chuan inlawmna thu a sawi a. Khualzahawm Pu David H. Lalthangliana, AIG (Hqrs), PHQ chuan House Captain thlan tharte endikna hun a hmang a. Principal kaihhruaia thu tiam an lak hnuah House Captain-te atangin thusawi ngaihthlak a ni bawk.