1059/2026-2027

Kolasib, 18th June, 2026: Vawiin khan DC Conference Hall, Kolasib-ah Kolasib Bawrhsap Pu H. Dolianbuaia hovin District Tourism Management Committee (DTMC) thutkhawm neih a ni.

Thutkhawm kaihruaitu DC chuan thu sawiin, district hmasawnna tur thil pawimawh hrang hrang ngaihtuahin thutkhawm neih fo thin ni mah se, Tourism (khualzin hip luh) lam hawia thutkhawm neih a ni chu lawmawm a tih thu a sawi a. Tun dinhmunah Kolasib district-a neih turin ruahmanna (festival) lian tham tak pahnih buatsaih tuma hmalak mek a nih thu sawiin, hotu lam atanga pawm a nih chuan khualzin hip theihna tur festival lian tham tak kan huaihawt thei dawn a ni, a ti.

"Kan district chhungah hian khualzinte tlawh tlak hmunhma tha tak tak kan nei a. Hengte hi pholanga, hma kan sawn chuan a hlawkpui ber tur chu mipuite bawk an ni," tiin, dawr leh eizawnna chi hrang hrang atanga sum thahnem tak mipuiten an lakluh theihna tur a nih avangin DTMC member kalkhawmte chu ngaihtuahna seng a, thahnemngai taka thawk turin a chah a ni.

He hunah hian Pi Rachel Lalrinhlui, Deputy Director, Tourism Department pawhin thu sawina hun hmangin, India ram pumah Mizoram chu khualzin tlawhtu pung chak ber (highest growth rate in tourist arrivals) kan nih mek thu a tarlang a. Kolasib District chhunga khualzin hip theihna hmunhma (tourist destinations) pawimawh zualte thlang chhuak a, engtianga tlangzarh leh tihhmasawn zel tur nge tih chu District level-a ngun taka ngaihtuah ho a pawimawh hle a ni, a ti. Khawtlang mipuite nena thawhhona (community participation) leh mipuite zirtirna (awareness) uar taka kalpui zel a ngaih thu a sawi bawk.

Meeting-ah hian kum 2025-26 chhunga Kolasib District-a khualzin tlawhtu dinhmun (statistics) thlirho a ni a. Report-a a lan danin, he hun chhung hian Kolasib-ah khualzin 90,533 an awm a, heng zingah hian ram dang mi (foreign tourists) 35 an tel a ni. Hei hi Mizoram puma khualzin tlawhtu zawng zawng atanga chhutin za zela 9.24 (9.24%) zet a tling a ni.

Hei bakah hian Kolasib District chhunga Tourist Destination lian tham zual awmte thlirhovin, heng hmunte tihhmasawn dan tur leh tlawhtu tam zawk an awm theih dan turte chipchiar taka sawiho nghal a ni.