1058/2026-2027

Aizawl the 18th June 2026: Vawiin khan Mizoram Police Headquarters (PHQ) chuan 3rd Battalion MAP Parade Ground, Mualpuiah Assistance to State & UTs for Modernisation of Police Scheme atanga lei lirthei chi hrang hrang 219 chu Chief Minister Pu Lalduhoma'n a vailiam a, Pu K. Sapdanga, Home Minister-in a telpui.

Lirtheite hi an la rawn thleng kim lo deuh a, an thlen kim hunah chuan a vaiin 219 an ni ang. Mizorama Police Station zawng zawng (P/S 44) ten a thar pakhat tal an dawng vek dawn a, chu mi zarah chuan Outpost 15 pawhin lirthei an kawl theih phah dawn a ni. Battalion te, Specialised Unit te leh Police Training School te pawhin an dawng bawk ang.

Thusawiin Chief Minister chuan, Central sorkar Scheme, Assistance to State & UTs for Modernisation of Police, (ASUMP) atanga kan fund hmuh zawng zawng hi state share-te nen Rs. 44.53 Crore a ni a, heng zinga Rs. 30.45 hi lirthei lei nan bik hman a ni a, a dang hi Police thuam chakna hmanraw thar chi hrang hrang lei nana hman a ni.

Kum 2017 atang khan ASUMP atanga lirthei lam chi lei hi central sorkar hian a rawn khap a. Kan police ten lirthei lamah harsatna an tawk chho a. Assembly House lamahte pawh sawi rik a ni thin a.

Kan mamawhziate uar taka sawi chungin, nikum khan action plan kan thehlut a. Kan DGP Pu Sharad Agarwal hian theihtawp chhuahin a bawhzui a. Hun rei tak an lo phal tawh loh thil kha min rawn phalsak ta a ni.

Technical thila harsatna kan neih avangin Mizoram hian Police Modernisation Scheme hi kum 2021 atang khan kan dawng tawh lo va. Kan sorkarah kan han hmu thar leh ta hi a lawmawmin a chhinchhiahtlak a. Kan Home Minister leh a thawhpuite chungah hian kan lawm hle a ni, a ti.

Lirthei thar dawngtute chu an lirtheite duat tak enkawl tura chahin, a thar han lei leh hi a harsa a, vawiina kan dawnte hi hun rei tak hman theih kan tum dawn nia a ti.

Kar hmasaa New Delhi-a Pu Amit Shah, Union Home Minister nena an inkawmna chungchang pawh tarlangin, NE state dang zawng zawngten Security Related Expenditure an dawn laiin Mizoramin hian kan dawng ve lo va. Cyber Crime dona tur leh Drugs tawlhruk dona atana kan hman ve tur SRE Fund hi min pe ve turin ka dil a. PM DevINE lamah project rawn thenlut zawk la, ka lo bawhzuisak ang che min lo ti a. Tin, raltlante chhawmdawlna pawh ka dil leh a, chu pawh chu buhfai Rs. 10 Crore man hu min pek leh tur thu min hrilh a. Home Ministry hian kan harsatnate hi min hrethiam a, kan lawm thin hle a ni, a ti bawk.

Pu K. Sapdanga, Home Minister pawhin thusawiin, Mizoram police te thawhrimnaah lawmthu a sawi a, lirthei tharin an nitin hnaah awlsamna tam tak a thlen a beisei thu a tarlang. Kan police te thuam chak hi kan ram himna thuam chakna leh khawtlang nuam neihna a ni tih kan hria a. Thuam chak zel kan tum a ni, a ti.

Lirthei vailiam inkhawmah hian Pu Sharad Agarwal, IPS, DGP Mizoram pawhin thu a sawi a, lirthei thar neih duhna ngawr ngawra he hmalakna hi kalpui kan ni lo va. Hna thawh tha zawk kan neih theih nana inthuamchakna, tunlai changkanna umpha tura inbuatsaihna a ni, a ti. Tun hnaia sorkarin police hnaruak tam tham tak a hnawhkhahsak avangin lawmthu a sawi bawk.

ASUMP kaltlanga hma an lak dan tlangpui report Pu Vanlalfaka Ralte, MPS, AIG (Modernisation) chuan a sawi a ni.