1057/2026-2027

Dated Aizawl, the 18th June 2026: Vawiin khan Cooperation Department changtu Minister Pu P.C. Vanlalruata chuan Mizoram State Cooperative Union (MSCU) Annual General Assembly vawi 37-na Vanapa Hall-ah an hmanna chu khuallian niin a telpui.

Cooperation Minister chuan MSCU inkhawmpuilian vawi 37-na a hmanpui thei chu lawmawm a tih thu sawiin, Cooperative Society-te chu Mizoram hmel tidanglama, state economy tithang theitu an ni, a ti a. Sawrkar pawhin cooperative society-te hmasawn zelna atan Mizoram Cooperative Joint Mission hnuaiah ‘profit-making cooperative society’ (hlawkna tel thei cooperative society) sangkhat (1000) tal din tura rawtna proposal Ministry of Cooperation-ah an thehluh tawh thu leh society tinte chuan annual turnover rate cheng vaibelchhe khat tal neih theih an inbeisei thu a sawi a. Hemi anga an hlawhtling thei a nih chuan member-te income pawh 100% a pun dawn thu sawiin, he mission-ah hian cheng vaibelchhe 303 lai kum 3 chhunga implement theihna tur proposal thehluh a ni tawh a. He mission hi a hlawhtling thei a nih chuan Mizoram society-te chuan hmasawnna rahbi thar an chuangkai ngei ang, tiin Pu P.C. Vanlalruata chuan a sawi.

Pu P.C Vanlalruata chuan central sawrkarin White Revolution 2.0 initiative (bawnghnute tharchhuah tihpunna) a kalpui mek bawhzuina atan Mizoram sawrkar chuan MULCO (Mizoram Milk Producers’ Cooperative Union Limited) leh NDDB (National Dairy Development Board) te chu MoU a sign pui tawh thu a sawi a. He inremna kaltlang hian bawngpui tha 1000 tal kum thum chhunga lakluh theih a, MULCO-in bawnghnute a tharchhuah pawh litre 15,000 chuanga a pun theih ngei beisei a ni, a ti a. He MULCO tihchangtlun zualna (revitalization) initiative-ah hian cheng vaibelchhe 24.10 (Central sawrkar tum: vbch. 16.78 leh Mizoram sawrkar tum: vbch. 7.32) ruahman a ni. Minister chuan Silk Samagra 2.0 scheme hnuaia ‘Integrated Muga Silk Development Project’ atan cheng vaibelchhe 5 approve a nih tawh thu leh, ‘Integrated Sericulture Post-processing Hub’ atan cheng vaibelchhe 125 lai budget atan ruahmanna siama thehluh a nih tawh thu a sawi bawk.

He programme-ah hian Cooperation Department Commissioner & Secretary Pu Udit Prakash Rai chu khual zahawm niin thu a sawi a. Cooperation department chuan department hrang hrangte nen thawhhona an neih thu te sawiin, Mizoram Cooperative Apex Bank (MCAB) in Scheduled Bank status a nei thei chu Mizoram cooperative society te tana mel lung pawimawh tak a nih thu a sawi a. Kum 2047-ah chuan Mizoram GDP 10% chu cooperative society-ten an thawhchhuah theih a beisei tih Pu Udit Prakash Rai chuan a sawi. Cooperative Society Registrar Pu John L.T. Sanga pawhin thu sawiin Cooperation Department chuan kuthnathawktute a ngaih pawimawh thu leh cooperative society-te tan nasa taka hmalak an tum thu a sawi bawk.

Mizoram State Cooperative Union (MSCU) hi Mizorama State Level Cooperative Society-te zinga upa ber niin kum 1975 khan din a ani a, Mizorama Cooperative Society zawng zawngte hnena zirtirna hrang hrang pe tura din a ni a, Mizoram mipui ten Cooperative Society an hriat bel a, an hman thiam theihna atan hma an la thin a ni.

Vawiin programme-ah hian MSCU President Pu K.Lalchamreia chuan chairman niin inkhawm hi a kaihruai a,MSCU Chief Executive Officer (CEO) Pu K.Lalruatfela chuan Annual Report (2025-26) pein, MSCU Vice-chairman Pu F.Lalchungnunga chuan lawmthu sawina neiin inkhawm hi a khar a ni.