4087/2025-2026

Aizawl the 21st January 2026: Vawiin khan Chief Minister Pu Lalduhoma hovin CM Conference Hall-ah Mizoram Pro - Active Governance & Timely Implementation (Mi-PRAGATI) meeting hmasa ber neih a ni a.  Member eng emaw zat a hmunah an thu a, member dangten video conference hmangin an thlunzawm a ni.

Mi-PRAGATI Member Secretary, Pu Khilli Ram Meena, IAS, Chief Secretary chuan thuhma sawiin, PRAGATI chu state chhunga hmasawnna hnathawh lian te vil a, harsatna an tawhte chin fel dan dappuitu tur leh a tul anga department hrang hrang thawhhona tichak tura din a ni a. Mipuite tana rawngbawlna tam zawk, langtlang leh rang zawk kalpuina tur a ni, a ti.

He meetingah hian sorkar hmalak mek thlan chhuah bikte report ngaihthlak niin harsatna an tawh mekte chipchiar takin an sawi hova, a chin fel dan tur pawh an duang zel a ni.

An sawiho project te chu:

1. Aizawl Western Side Bypass Road: Hnathawk mek report an ngaithla a, an hna thawh meka harsatna awmte leh a chinfel dan tur te an sawi a.

Chief Minister chuan, Aizawl Western Side Bypass road laih meka leivung paih dan fel lo chu chak taka bawhzui turin a mawhphurtute a hrilh a. Contractor-in dan dik takin leivung a paih tur a ni a, dumping ground pawh dan ang thlapin a siam tur a ni. Dan anga fel taka leivung paih a nih dawn loh chuan hnathawh pawh chawlhtir rih mai tur. Mizoram hmun danga NHIDCL kawngpui laihah pawh chutiang bawkin leivung paihna a fel faiin dan ang thlapa kalpui zel a ni tur a ni, a ti.

2. Vairengte - Sairang 4 lane National Highways laih mek pawh sawi hovin, harsatna awm hrang hrangte tarlan a ni a. A bawhzui dan tur an rel a ni.

Vairengte - Sairang inkar kawngpui awmsa, thawm thatna kalpui mek pawh NHIDCL lamin report an pe a. Chak taka hmalak a nih thu an tarlang.

3. Swadesh Darshan 2.0 hmanga Thingsulthliah Conference sak mek leh Unity Mall sak mek report pawh pek niin chak taka umzui zel a nih thu tarlan a ni. 

Mi-PRAGATI hi nikum August thlaa din a ni a. Member te chu Principal Secretary, Secretary leh Deputy Commissioners te leh state chhunga central sorkar department / agency head te an ni.