4088/2025-2026

Lunglei, 2026 Pawlkut thla ni 21: Vawiin khan Directorate of Economics & Statistics leh Lunglei District Research Office ṭang kawp huaihawtin Government J. Buana College Multipurpose Hall, Lungleiah Lunglei District chhung, Lunglei Municipal Council (LMC) pawn lama piang leh thi chhinchhiahtu [Registrar of Births & Deaths (RBD)]-te tan intuai tharna (annual training) buatsaih a ni a. Lunglei District Additional Deputy Commissioner Pi Rochuangkimi Khenglawt chuan Khuallian niin hun a hmanpui.

Khuallian Pi Rochuangkimi Khenglawt chuan piang leh thi chhinchhiahtu (Births & Deaths Registrar)-te chu ram leh hnam tana hna ṭangkai tak thawk an ni tih inhre nawn a, tun lai thiamna mil zela insiam rem thiam turin a chah a. Registration chungchangah hnam dang (foreigner) laka fimkhur a ngaihzia leh ram hnuk khawih thil a nih anga rinawm a ṭulzia sawiin, danin a phut anga dik tak leh ṭhahnem ngai taka hna thawk zel turin RBD-te chu a chah.

He hun hi Lunglei District Research Officer Pu Pc. Vanlalrova chuan a kaihruai a. Economics & Statistics Deputy Director Pi B. Vanlalrengi pawhin thu sawiin, RBD Act chu kum 1969 aṭangin India ram state hrang hrangah hman ṭan a nih thu leh kum 2023 khan he dan hi siam ṭhat (amend) a nih thu a sawi a. Kum tin Births & Deaths Registration hna thawktute tan training hi buatsaih ziah a nih thu a sawi.

State Co-ordinator Pi Lalnunpuii Pachuau chuan powerpoint presentation  hmangin RBD-te tana hriat tur pawimawh hrang hrang a zirtir a. Form dah khah dan leh tih tur hrang hrangte a taka tih chhin nghal niin, zawhna leh chhanna leh sawi hona hun hman a ni bawk.