4089/2025-2026

Lunglei, 2026 Pawlkut thla ni 21: Vawiin khan Lunglei DC Conference Hall-ah District Bawrhsap Pi Navneet Mann hovin Lungleia Republic Day 2026 atana inbuatsaihna kal mek thlir ho a ni a. Sawrkar official-te, zirna in, pawl hrang hrang leh kohhran ai awhte an tel. 

Mawhphurhna nei department leh mawhphurhna nei pawl hrang hrangte hnen aṭangin an hma lak dan leh inbuatsaih dan ngaihthlak a ni a. Republic Day ceremonial parade atana inbuatsaihna kalpui mekah January ni 20, 2026 (Thawhlehni) zingkar aṭangin parade zir ṭan a nih thu leh January ni 23, 2026 (Zirtawpni) chawhmaah final rehearsal buatsaih tum a nih thu te, ceremonial parade-ah hian armed contingent 5, unarmed contingent 6, school contingent 9 leh pipe band 2, a zavaiin contingent 22 awm thei tura beisei a nih thu te tar lan a ni a. Inbuatsaihna hrang hrang pawh tluang taka kalpui a nih thu tar lan a ni bawk. 

Kumin Republic Day lawmna hi Lungleia C. Ṭhuamluaia Mualah January ni 26, 2026 (Thawhṭanni) zing dar 9:30-ah hman tur niin, District Bawrhsap (Deputy Commissioner) Pi Navneet Mann chu Khuallian a ni dawn a. Ram puanzar pawh pharh, ceremonial parade, Khuallian thu sawi leh lawmman hrang hrang semna hun te hman tur niin, Muala Republic Day lawmna hun hman zawh, chawhma dar 11:30-ah DC Bangla tualah 'VIP At Home' buatsaih tum a ni bawk a. Lunglei District-a chhawmdawlna in, damdawi in leh District Jail-ah te Republic Day pual ṭanpuina thilpek pek leh tum a ni bawk. 

Republic Day ni-ah hian sawrkar office, zirna in leh sawrkar quarters-ah te India ram puanzar zar vek tura tih a ni a. Sawrkar hna thawkte chu Republic Day lawmnaah hian tel ngei tura beisei niin, tlawmngai pawl leh kohhran hrang hrang hruaitute, media mite leh mipuite pawh Republic Day lawmnaa tel vek turin Lunglei District Republic Day Celebration Committee chuan a sawm a ni.