Chief Minister Pu Lal Thanhawla kaihhruaina hnuaiah vawiin khan Chief Minister’s Conference Hall-ah Mizoram Institute of Medical Education & Research (MIMER) leh New Economic Development Policy (NEDP) hnuaia Health Sector tih changtlunna chungchangah meeting pawimawh tak neih a ni a. Meeting ah hian Finance Minister Pu Lalsawta; Health Minister Pu Lal Thanzara; Secretary, Health & Family Welfare Department Secretary, Planning & Programme Implementation Department; Secretary, Finance Department te bakah Health & Family Welfare Department senior officers an tel a ni.

Chief Minister Pu Lal Thanhawla chuan Sawrkarin Mizoramah Medical College din chu tha tiin hemi atan hian theihtawp chhuahin hma a la mek zel a, Medical College dinna tur ruangam leh hmanrua (infrastructure) chu Central Funding atanga tih tur ni mahse a thawktute hlawh leh a inenkawlna chu state sawrkarin a ruahman a ngai dawn a, hemi atan hian sum leh pai mamawhna pawh a tam dawn a. Chu mai bakah Sawrkar chuan Medical College tha tak din a duh vangin he thil hi uluk leh zau taka ngaituah hova hmalakna te thlir ho fo a ngai dawn a ni, a ti a. Health Minister Pu Lal Thanzara chuan Medical College dinna atan hian hmabak a la tam thu leh hengte hi ngaipawimawha a theih ang anga chak taka hma lak mek anih thu a sawi.

Hemi hnu hian Dr. Jane Ralte, Nodal Officer in presentation hmangin MIMER chungchanga hmalak tawhna te, sum leh pai senso ngai zat tur te leh hmachhawp dangte a tarlang a. Health Secretary Pu Lalrinliana Fanai chuan Indo Global Health Consortium (IGHC) nen hriselna leh health sector tih changtlunna atana thawhho dan tur chungchanga Health Deapartment-in hma an lak dan leh inbiakna an neih dan te a sawi a. Hemi chungchangah hian IGHC hotute te karleh ah Aizawl an rawn zin tur thu meeting ah hian a sawi bawk. Dr. T. Lalhmangaihi, Joint Director, Hospital and Medical Education chuan NEDP kaltlanga Aizawl leh Lunglei Civil Hospital te leh District Hospital zawng zawng te tihchangtlunna atan leh MIMER dinna atana State Referral Hospital, Falkawn tihchangtlunna atana ruahmanna an siam te a tarlang a. Pi Lalchhanhimi, Principal, Mizoram College of Nursing chuan IGHC nena thawk hova nurse zir zo te tan ram danga hna an hmuh theih nana proposal ruahman chin chu sawifiah bawk a ni.

Meeting chuan Medical College dinna atana thil tul leh bawhzui ngaite procedural matters chungchangah chak tak hmalak a nih theih nan Planning & Programme Implementation Secretary kaihhruaina hnuaiah Steering Committee din tha tiin he Committee ah hian Finance, DP&AR leh Health & Family Welfare Department aiawhte chu telh nise an ti a. Health Deapartment pawhin Road Map changtlung zawk siam se tiin an rel bawk.

Tarlan tawh thin angin Mizorama Medical College din tur Central Scheme niin ‘Scheme for Establishment of new Medical Colleges by upgrading District/Referral Hospital’ hnuai a kalpui tur a ni a. He ruahmanna hnuaiah hian ram pumah medical college thar 58 din tum a ni. Medical College dinna atana senso za zelah 90 chu sawrkar laipui tum tur niin za zelah 10 chu state sawrkar-te tum tur a ni thung a. MIMER dinna atana sum mamawh zat chu cheng vaibelchhe 189 vel a ni.