Nimin (28.9.2017) chawhnu khan Mizoram Science, Technology & Innovation Council (MISTIC) Governing Body chu an Chairman Chief Minister Pu Lal Thanhawla kaihhruaiin Chief Minister's Office, Cabinet Room-ah an thukhawm. 

Chief Minister Pu Lal Thanhawla chuan ram economy hmasawnna chu Technology lam hmasawnnaah thui tak a innghah thu sawiin, Mizoramah pawh science lama hriatna leh thiamna tihpun a nih a hman tangkai a nih theih nan sum hman dan turah Council chuan ngaihtuahna a sen uluk a pawimawh hle a ni, a ti a. Mizo thalaite zingah science and technology lama ngaihtuahna tha tak tak nei leh remhre tak an awm teuh laiin, an thiamna te tangkaia hman theihna tur remchanna an neih tawkloh thin avangin chhawr tangkai loh thiamna inthup an awm teuh thu sawiin Chief Minister chuan chhungte tana kawng remchang zawn sak a nih a, "local innovator"-te chawikan hna MISTIC in a kalpui mek chuan awmzia a neih chhoh zel a beisei thu a sawi bawk a ni. 

Thusawitu dang, Finance Minister Pu Lalsawta chuan tunlaiah hna thawh tur hmuh leh hmuh lo chu ramin kan buaipui ber zing ami a nih avangin hmasawnna hmachhawp neih hrang hrangte hi eizawnna siam thei emaw hna tha tak nei thei tura thiamna tha zawk siam tumna ni zel thei se a tih thu a sawi. 

Pu H. Liansailova, State Planning Board Vice Chairman pawhin entrepreneurial development kalpui mek atangin thalaite zingah tui tak tak an awm thu sawiin, MISTIC in tualchhung/ tualchher mithiamte (local innovators) tihhmasawn a tumna pawh entrepreneurship development nen a kalkawp a inhmeh hle a ni, a ti. 

Dr. R.K. Lallianthanga, Chief Scientific Officer leh Member Secretary, MISTIC chuan sorkar kum kalta 2016-2017 chhunga MISTIC hmalakna report a pe a. Heng zingah hian Mizoram Science Centre-a National Council of Science Museums (NCSM) sum bultum hmanga Innovation Hub leh 8.0m Diametre Dome Planetarium sak zawh fel tep a nih thu te, Lungleia Digital Planetarium sakna tur Rs. 314 lakhs NEC in a phalsak tawh leh chumi atanga 1st Installment Rs. 113.04 lakhs pekchhuah a nih tawh thu te, Mizoram puma Science Popularization Programme hnuaia function leh intihsiakna hrang hrang neih a nih thin thu te, thingtlang khaw thenkhat a Science and Technology Mass Awareness Programme neih a nih thu te, tualchhunga thil siamchhuak thiam leh  zawnchhuah hna thawh a nih thu te leh heng mithiamte thil siamchhuah pholanna exhibition buatsaih a nih a, tha zual thlanchhuahte hnenah puihna pek a nih thu te leh state pawna Innovation Festival-a te kalpui an nih thu te a sawi a. NEDP hnuaiah Innovation Facility Centre sakna tur atan 2016-2017 chhung khan Rs. 178 lakhs pek chhuak a nih thu leh, a bak Rs. 489.18 lakhs chu a kum leh a beisei a nih thu te a tarlang a ni. NEDP hnuaiah Innovation Facility Centre sakna tur atan 2016-2017 chhung khan Rs. 178 lakhs pek chhuah a nih thu leh, a bak Rs. 489.18 lakhs chu a kum leh atan beisei a nih thu te a tarlang a ni. 

Meeting hmasa lama MISTIC a thawktu lak tura rel chu bawhzui tawh niin mi 11 lak thar an ni a.Kum 2016-17 chhung khan Patent Information Center chuan Patent pakhat a file a, Trademark 4 file zinga pakhat (Aizawl Thunders) chu pawm tawh niin, Mizo Puan panga (Tawlhlohpuan, Mizo Puanchei, Pawndum, Ngotekherh leh Hmaram) atan Geographical Indication dil mek a ni. 

Vawiin meeting-ah hian kumin a Aizawl khawpui chhunga ruahtui tlak dan nitina Meteorological Data chhinchhiah thin chu tarlan niin, kum 2015, 2016 leh 2017-a January atanga August thla chhung ruahtui tla zat theuh khaikhinin kum 2015 chhhung khan 1818.7 mm, kum 2016 chhungin 1684.6 mm, 2017 chhungin 2073.1 mm a tla a, kum hmasa lam te ai chuan kuminah ruahtui tla hi a tam hle a ni.

He meeting-ah hian kum 2017-18 chhunga Annual Plan sawiho leh pawm a ni a, Audit Report thlirho a pawm ni bawkin, MISTIC ruangam siam that chungchang sawiho a ni a. Directorate of Science and Technology chu department puitling a hlankai a nih theih dan tur te sawiho a ni bawk. 

Meeting-ah hian MISTIC Governing Body member hrang hrang - Planning Minister Pu Lalsawta; Mizoram State Planning Board Vice Chairman Pu H. Liansailova; Planning Secretary te bakah University leh Science Society atangtein member an tel a ni. 

Mizoram Science, Technology & Innovation Council (MISTIC) hi February ni 12, 1985 khan din tan a ni a. Directorate of Science & Technology, Planning Department hnuaiah "autonomous body" a awmin, Chief Minister chairman na hnuaiah Executive Committee leh Governing Body rorel thutlukna leh rawtna hnuaia hmalak thin a ni a. State chhunga science & technology lama hmasawnna project hrang hrang a kalpui thin a ni.