Vawiin khan kum 2016 chhunga PRRS hri leng vanga Lawngtlai Disrtrict-a vawk thite ralna hun chu Lawngtlai AH & Vety Department chuan DVO office complex-a Farmer’s Training Hall-ah an buatsaih a. LADC-a AH & Vety changtu Executive Member Pu C. Lalneihkhuma’n khuallian niin a hmanpui.

Pu C. Lalneihkhuma chuan Mizoram sawrkarin vawk vulhtute ngai pawimawha hri lengin an vawk a tihhlumte ralna a buatsaih chu lawmawm a tih thu leh vawk vulhtute tan a thlamuanthlak hlea a hriat thu a sawi a. NLUP hnuaia vawk vulh thlangtu tam takin an hlawhtlinpui thu leh tuna vawk chan tate zinga tam tak hi NLUP hnuaia vawk vulhtu an nih thu sawiin, beidawng mai lo leh hlawhtlin tuma tha thara hma la leh turin a chah a. Hlawhtling tur chuan kalhmang fel leh tum mum tak neia vawk vulh a tul tih sawiin, vawk hralhna atanga sum hmuh te hmang zo nghal zel lo va, khawl nachang leh vawkte tam zawk vulh tura lei belh thin nachang hriat a pawimawh a ni, a ti.

Vawk thi ralna hun hi Lawngtlai District AH & Vety Officer Dr B. Zonghinga’n a kaihruai a. Vawk vulhtu kal khawmte ai awhin Pu Lalramliana Kawlni, Lawngtlai-III chuan thu a sawi bawk.

Kum 2016 chhunga Lawngtlai District-a PRRS vanga vawk thi hriat theih chin hi a vaiin vawk 537 a ni a. Hei chi chhungkaw 210-in an tuar a ni. Ralna sum hi vawkte leh a thang lai (grower) pakhat thi-ah Rs 500/- leh vawkpa leh vawkpui puitling chinah Rs 1,000/- zel pek a ni a. A vaiin Rs 3,25,000/- sem chhuah a ni.