Tunkar nilaini atanga tan Lawngtlai District chhunga nu nau pai leh nausen hriselna atan leh malaria natna do nana hma lakna thlir letna leh intuaitharna hun Lawngtlai CMO Conference Hall-a neih chu vawiin khan zawh fel a ni.

Lawngtlai District Health Department hnuaia he lam kaihhnawiha thawkte tana buatsaih District Level Review Meeting on Reproductive and Child Health leh District Level Review Meeting-cum-Training-ah hian District chhunga hma lakna kalpui mek chu nasa zawka kalpui chhunzawm zel a tul thu sawi lan a ni a. He huna tel Medical Officer, Community Health Officer, Health Supervisor leh  Health Worker te'n PowerPoint presentation hmangin an huamchhunga an hma lakna dinhmun an tar lang a. Mi thiamte'n hriselna lama chak zawka hma lak a nih theih nana sawrkar ruahmannate an sawi fiah bawk. 

A kharna hun hi Lawngtlai District Chief Medical Officer Dr Thani Pachuau chuan hmanpuiin, Lawngtlai District chuan hriselna lamah chak zawka hma a sawn theih nan Health Department hnuaia thawktute chu tan la sauh sauh turin a fuih a ni.