Vawiin khan Mizoram Bharat Scouts & Guides State Council Meeting chu an President Chief Minister Pu Zoramthanga hovin neih a ni a. Vice President pahnih School Education Minister Pu Lalchhandama Ralte leh Sports & Youth Services Minister Pu Robert Romawia Royte te pawh an tel a ni.

Chief Minister Pu Zoramthanga chuan a Scouts & Guides ah a tam thei ang ber lakluh chu tunlai boruakah pawimawh zual a tih thu sawiin, ruihhlo leh sualna hrang hrangin thangtharte nun a tihbuai lai hian Scouts & Guides inkaihruaina chuan thuawihna leh invawng taka nung turin an thinlungah tuhin, nun kawng kaihruaitu tha a nih thu a sawi a. Moral reformation atan pawh a pawimawh thu sawiin thinlung kaihruaitu atan naupang zawk leh thangtharte mai bakah puitling thleng tan a tul thu a sawi. Mizoram Scouts & Guides hmalakna hrang hrang lo neih thin tawhte chu pawimawh a tih thu leh hmasawm zelna tur activity dangte pawh a tul chuan rawt zel turin President chuan council member-te a sawm a ni. Be

Vawiin Scouts & Guides State Council meeting-ah hian kum 2018-19 chhunga pawl hmalak tawhna hrang hrangte leh activities neihte ngaihthlak niin kum 2019-2020 chhunga hmalakna tur chhawpchhuahte chu ngaihtuah ho a pawm a ni a. State Headquarter building sak rawtna chu ngaihtuah zui zel tura rel niin, kumin kum tawp lamah State Rally neih ni se tia rel a ni bawk.

Mizoramah Scouts & Guides movement hian kum 86 hmel a lo hmu tawh a. Kum kalta khan Cub and Bulbul Advancement a sang ber national award "Golden Arrow Award" chu Mizoram atangin Cub 10 leh Bulbul 62 ten an dawng a, Scouts & Guides advancement sang ber national award Rashtrapati Award chu Scouts 5 leh Guides 22 ten dawng bawkin, State award sang ber Rajya Puraskar Award chu Scouts 74 leh Guides 102 ten an dawng bawk a ni. Scouts & Guides State Council Meeting hi kumtin vawi khat neih thin a ni.