Faina kawnga India ramin hma a sawn zual theihnan a kum tin faina kawnga inelna thianghlim ‘Swachh Survekshan’ ah kumin hian Mizoram khua pathumin lawmman an dawng. Mizoram Khawpui te (small city) zingah Champhai in ‘Cleanest City’ Award a dawng a, Lunglei in ‘Best City in Innovation & Best Practices’ award leh Vairengte in ‘Best City in Solid Waste Management’ Award an dawng a ni. He lawmman semna hi vawiin khan Vigyan Bhavan, New Delhi ah neih a ni.

Kum 2016 atang khan Swachh Survekshan hi Ministry of Housing and Urban Affairs hnuaiah kalpui a lo ni tawh thin a. Mizoramah pawh Swachh Bharat Mission (Urban) hi Urban Development and Poverty Alleviation Department hmalakna lian tak pakhat a ni. He inelnaah hian India ram pum hi zone nga (5) ah then a ni a, North East Zone bik hi, micheng tam dan a zirin category hrang hrangah then a ni leh a, Mizoram khawpui tam zawk hi Khawpui tenau category-ah dah an ni. He Award hian Memento leh Citation a keng tel a ni.

India ram khawpui fai inelna ‘Swachh survekshan hi khawvel faina inelna lian ber niin khawpui 4237 lai an telin, mihring vaibelchhe 40 chuang telna inelna a ni a, Mizoram khawpui 23 te an tel vek a ni. Kum 2016 ah khan khawpui fai inelnaah Aizawl chu khawpui 73 zingah 43-na niin, kum 2017 khan ‘Fastest Moving City’ Award in the North East Zone a lo la tawh bawk a. Kum 2018 Swachh Survekshan ah Biate khuain “Best City in Innovations” in the North East Zone Award a lo dawng tawh bawk a ni.