Nimin chawhnu khan Chief Minister's Conference Hall-ah Mizoram in cricket khelh kawnga hmasawnna tur kawng hrang hrang te Cricket association of Mizoram(CAM) chuan Chief Minister Pu Lal Thanhawla an sawipui. 

Cricket game, Mizo te khelh chi tak, India ram chhunga infiamna huanga sum tamna ber, domestic cup leh trophy tam tak kum tluan a khelh thinna, international leh national player chu sawiloh domestic player  leh  club player  tam takin ten an hauhsak pui mek ah Mizo thalai te an tel ve na turin Sawrkar nen tangduna CAM in hma ala mek zel chu lawm a tih thu Chief Minister chuan tarlangin a tul ang a piang chak taka bawhzui nghal zel turin CAM hruaitute chu a fuih a ni. 

Meetingah hian CAM General Secretay Pu Mamon Majumdar an kum in September ni 8 a Committee of Administrators (CoA)/ Board of Control for Cricket in India (BCCI) meeting-ah a Mizoram tan a vawikhatna  ni tura  a zu telna report pe in hmalakna chhunzawm ngai lai te sawihona neih nghal a ni a. 

 CoA/BCCI Meeting-ah Ranji Trophy chu state tin ten an state hminga an khelh tur thu leh state tin ten age group team te an neih theih tur thu tarlan a ni a. CAM aiawhtu chuan Mizoram chu BCCI affiliated member a la nih hman loh thu leh Ranji Trophy-ah telve ngei an duh tih CoA/BCCI hotute hi a hrilh a. Thurawn an lo pek angin Supreme Court ah petition thehluha Mizoram in Ranji Trophy a khelh ve theih nan hmala turin thutlukna  siam a ni. 

BCCI Affiliated member nih theihna kawnga tana tangkai tur, women cricket team, cricket technical committee, BCCI norms hmanga tournament tamzawk siam, BCCI in a phut ang jersey leh kits hman, school level a cricket competition lian tham a theih anga tam buatsaih te CAM chuan a tum a. CAM thilphut leh hmalak tumna te hi Chief Minister Pu Lal Thanhawla, CAM President ni bawk chuan CoA President Pu Vinod Rai leh IPL Chief Pu Rajeev Shukla te phone hmanga bia in a hrilh nghal a ni.