Mizoram Olympic Association (MOA) chuan an President Pu Lal Thanhawla, Chief Minister hovin  Chief Minister's Office Conference Hall-ah vawiin khan meeting an nei.

Meeting kaihruaitu MOA President Pu Lal Thanhawla chuan association member te chu lo lawmin, meeting hi National Games neih hma emaw a sarhu lai emaw a an nei theilo chu pawi a tih thu a sawi a. Mizo thalai inkhel leh infiammi ten hneh taka midangte el pha turin Mizoram pawnlama inphochhuah, exposure an mamawh a ni  tih sorkar chuan a hria a. Amaherawhchu sum harsatna avangin a kal chakpui theilo a ni a ti. Hemi kawngah hian state danga a tithei ten an tih thin angin, a khawsa thei deuhte leh mi inphal ten sponsorship te hi ti ve thei thin se a duhthu a sawi a ni.

Meeting-ah hian kumin 2011 February thla a Jharkand state a National Games vawi 34 -na neih taka Mizoram aiawhte chet that dan thlirletna neih a ni a. Discipline hrang hrang 8 a tlakchham leh tan lak ngaihna te an sawiho a ni. Hemi bakah hian kum kalta lama lo tih tawh thin, Olympic Day Run chu a ni ngai June ni 23, 2011 ah bawk Lammualah neih leh nise tih an rel a. MOA hnuaia games & sports association hrang hrangin dilna an thehluhte ngaihtuah a ni bawk a.Mizoram State Games neih dan tur chungchangte an rel bawk a ni.

MOA memberte hi eng games & sports association ber aiawh an ni vek a. Tunah hian President Pu Lal Thanhawla hian Mizoram Boxing Association ai a awh a, Sr. Vice President Pu Zodintluanga, Sports Minister chuan Tennis Association ai a awh a bawk a, an ni bakah hian Vice President 2, General Secretary, Joint Secretary 2, Treasurer leh member dang, an vaiin member 15 an awm mek a ni.