Health Minister Pu Lalrinliana Sailo chuan kar kalta Inrinni (ni 14 May 2011) khan Champhai, Khawzawl leh a chhehvel khuate a tlawh a.
Health Minister Pu Lalrinliana Sailo hi tukin zing dar 6:00 khan Khawzawl atangin Champhai a rawn thleng a. Champhaia Damdawi in, khum 100 awm theihna tur Tantia Construction sak mek chu a hmunah a enfiah nghal a. Kumin chhunga sak zawh tura tih a nih laia hna kal mek chu chak lo a tih avangin a satute chu nasa zawka tan la turin a hrilh a, a tul ang anga labour pawh lak belh turin a hrilh. Hei bakah hian Champhai a Nursing School sakna tur hmun te tlawhin Champhai District Hospital a Ayush OPD Building thar chu a hawng nghal a ni. Hemi hnu hian Health Minister hi Champhai District huamchhunga ruihhlo hluar chak lutuk leh HIV/AIDS vei pung chho zel do let dan tur chungchang, Champhai N Bialtu MLA Pu T.T. Zothansanga te Ina S.P., D.C. SE (Excise) leh NGO te nena sawihona neihah tel lehin hetah hian kalkhawmte chuan ruihhlo do chungchanga hmalak dan tur hrang hrangte an rel a, Champhai Sub-Headquarters in ruihhlo dona kawnga hma an lakna turin Health Minister Pu Lalrinliana Sailo, Champhai North Bialtu MLA Pu T.T. Zothansanga, Excise Minister Pu J.H. Rothuama leh Forest Minister Pu H. Rohluna ten cheng nuai 1 theuh an thawh a ni.
Sawrkar hmalakna hrang hranga Sawrkar hnathawkten tha taka an tawiawm thin avangin lawmthu a sawi. He thu hi vawiin chawhma dar 11:30 a Khawzawl Zuchhip Field a Rural Housing Scheme hnuaia 22-Tuichang Constituency huamchhunga In sakna tur Rangva dawng tura thlan chhuah mi 65 hnena Rangva a semna pual inkhawm tawi buatsaihah, Khawzawl Joint VCP Pu Tlanmawia kaihhruaiah he thu hi sawiin Minister chuan miretheite tana ding kan nih angin Rangva kan sem leh dawn a ni tiin Rangva an sem tur chu Central pawisa ni lovin State Sawrkar sum, Mizoram Budget atanga lei anih thu a sawi a. Sawrkar leh MLA tha tehna chu ram leh khawthlanga hmasawnna, Development kal chhoh dan atangin a ni tiin a bial mipuite chu amah lo thlir reng tur leh an Sawrkar kum tawp thlenga a bial hmasawn dante lo enthlithlai reng turin a chah bawk. Bialtu MLA hian a bialchhunga hmasawnna hna hrang hrang thawhnaa Sawrkar hnathawk te bakah Department Head te leh V/C lam tawiawmna chu lawmawm a tih thu pawh sawiin Khawzawl khawchhunga Sawrkar hmalakna hrang hrang RMSA hnuaia Govt. Khawzawl High School chei that te, Damdawi Eye Ward sak chungchangte leh Khawzawl khawchhung kawngpui chei that chungchang te tarlangin Khawzawl khawchhung kawng chu PWD E.E. leh Staff te thawhrimna a zarah Mizoram chhunga khawpui chhung kawng tha ber nia a hriat thu a sawi a, hei bakah hian Sawrkar hmachhawp hrang hrang te pawh tarlang telin Khawzawl Damdawi In lian leh changtlung zawk a sak hna chu kumin chhung hian thawh tan tum anih thu te, cheng vbc.26 senga Khawzawl khaw tuilakna tur buaipui mek anih thu leh UD&PA hnuaia hmasawnna hna thawhna turin cheng vbc.8.9 beisei mek anih thu te a tarlang bawk. Minister hian thu a sawi zawh hian 22-Tuichang Constituency huamchhunga GSA leh Football Club 20 te hnenah Jersey leh Football 5 theuhin a sem phawt a, hemi hnu hian Rangva sem tura thlan chhuah chhungkaw 65 te hnenah Rangva Bundle 4 zelin a sem leh a ni. Rangva semna hun hman zawh hian Minister hi Aizawl lam panin a haw thla nghal a ni.
