Vawiin chawhnu kha Chief Minister's Banquet Hall-ah Chief Minister Pu Lal Thanhawla hovin  Mizoram State Bharat Scouts & Guides(MSBSG) chuan State Council Meeting an nei. Chief Minister Pu Lal Thanhawla  hi MSBSG ah hian President  ni lai mek a ni.

Chief Minister Pu Lal Thanhawla chuan Scout & Guides inkaihhruainate chu naupang leh thalaite nun khalh ngil nan leh kaihhruai nan a tangkai tih a sawi a. "Changkanna in a ken tel niawm a lang inthlahdahna, nun uluk lohna leh ruihlo kaihhnawih thila chaklohna te hmanga kan thalaite harsatna tawh mek hi tanpui tura tan kan lak tlan a ngai a. Chumi kawngah chuan NCC leh Scouts & Guides te pawh nasa tak a pawimawhin an tangkai ngei pawh ka ring", a ti. Faina kawngah leh hriselna kawngah te pawl hrang hrang ten sawrkar an thawhpui zel a ngai a; tanrual phawt chuan Mizoram chu India ram a state fai pawl atangin a fai ber a ni thei hial ang a ti. MSBSG in hlawhtlinna hrang hrang a neih te leh India ram pum huap ang pawh a chawimawina a dawng chu a lawmpui tih a sawi a. Nu leh pa zawng zawng ten an fate tan leh an fate tih ve atan  Scouts & Guides chu an duh ve theih nan a puanzar leh a puandarh kawngah MSBSG pawh tan la zual sauh se a duh thu a sawi a ni.

MSBSG State Council Meeting hi President remtihna in  MSBSG State Chief Commissioner Pu Zothanmawia'n a kaihruai a; MSBSG State Secretary Pi Saizampuii'n report a pe a. Meeting-ah hian MSBSG hmachhawp hrang hrang sawi ho a ni.

Report a MSBSG hlawhtlinna te tarlan a nih dan chuan  kum 2016 chhungin Scouts 15 leh Guides 17 ten Rashtrapati Award an dawng a; kum 2016 chhung tho khan Cubs 26 leh Bulbuls 76 ten Golden Arrow Award an dawng a; kum 2016 chhung bawkin Scouts 47 leh Guides 53 ten Rajyapuraskar Award an dawng a ni. President of India hnen atangin kum 2016 May ni 12 khan Pi Lalrosangi, ASC (G) chuan Silver Elephant Award a dawnga; hemi ni tho hian President of India hnen atang bawkin Pu K.Lalrintluanga, ASG (S) chuan Silver Star Award a dawng bawk a ni.