Health Workers’ Training School, Kulikawn chuan vawiin khan an kum 60 tlinna ‘Diamond Jubilee’ an lawm a, he hunah hian Health Minister Pu Lal Thanzara chu Khuallian niin Director, Health Services Dr.Lalchungnunga leh Training School Principal Dr.V.Lalhmingliani, PMO ten an tawiawm a ni.
Diamond Jubilee chibai bukin Khuallian Pu Lal Thanzara chuan Health Workers’ Training School din theih nana theihtawp chhuah a bul lo tantu, sorkar leh department lam hotute chungah lawmthu a sawi. Bultan a nih atanga theihtawp chhuaha he School enkawltute leh tluang taka a kal zel theih nana thahnemngai tak leh theihtawp chhuaha tuna thawk mek, PMO leh staff zawng zawngte chungah pawh lawmthu a sawi bawk. Mizoramin ANM/health Worker zirna heti zata upa a nei hian Mizoram chu hriselna lama thawhtute training0-na lamah a hniam lohzia a tilang a ti a. Heta tanga mi thhnem takin ANM/Health Worker tha takin an lo pass chhuak tawh a, Mizoram hmun kilkhawr leh ril berah te awmin mipui thlamuantu an ni a, eng anga hlaa post an nih pawhin phunnawi lova tha taka an hna an zawm a, theihtawp an chhuah thin avangin lawmthu a sawi bawk. ANM/Health Worker Course chu tunhma khan Certificate Course ni thin a, kumin November thla atangin Mizoram Nursing Council hotute hmalakna avangin Indian Nursing Council chuan Diploma Course-ah a hlang kai ta chu a lawmpui thu a sawi. He Training School hian ANM/Health Worker inzirtir satliah mai lova mi puitling, khua leh tui tana mi chhenfakawm, Kristian Health Worker tha tak a chherchhuah nan theihtawp chhuah zel turin duhsakna a hlan.
Jubilee chhim tura kalkhawmte lawmna thu sawitu Principal Dr.V.Lalhmingliani, PMO chuan he Training School din tirh atanga a thawkte leh zirchhuak zawng zawngte tel tura sawm an ni a, mi engemawzatin min la dampuiin min rawn hmanpui theih avangin kan lawm hle a ni, a ti.
Pi Lalrinawmi Rokhum, SSI chuan Health Workers’ Training School, Kulikawn bultan a nih dan leh vawiina a dinhmun chungchang Report a pe a. Kum 1950 April thla atangin Aizawl Civil Hospital-ah DAI Training Course tan a ni a, kum 1 chhung training pek thin a nih thu leh April 1950 - June 1959 chhungin mi 101-in DAI training course an zo, a ti. Kum 1956-1957 chhungin Midwifery training mi 7-in an zo leh a. Kum 1957 September thla atangin Auxiliary Nurse Midwifery (ANM) Class VII passed chin mi 8-in an zo leh a; hemi kum atanga chhiarin Diamond Jubilee hi vawiinah lawm theih a ni ta a ni, a ti. India leh China indo lai khan, kum 1963-ah Emergency Nursing Aids (ENA) mi 19-te 3 months training pek an ni nghe nghe.
Health Worker Training School atanga training chhuak tawh zawng zawng chu Mipa-507, hmeichhia- 658, an zavaiin 1165 an ni a. He School-ah hian thawktuten an hna pangngai bakah Department dangte leh NGO pawl hrang hrangte ngenna avangin First Aid leh thil dang training an pe thin a, chungte chu : Mizoram Home Guards, Police, TBZ Missionary, Synod Mission Board hnuaia Missionary, Bethany Centre, Sihphir, Disaster management Department, Central YMA, Red Cross Society, Scouts & Guides leh School hrang hrang te an ni.
