Vawiin chawhma khan Lunglei DC charge la mek tu Pu Benjamin Lalzama, MCS hovin a Office Chamber-ah District Level Core Committee on Reang (Bru) Repatriation chu kum 2018 March thla a Bru laklet dan tur ngaihtuahin an thukhawm.

Committee ah hian Lunglei District-a Bru laklet dan tur inpuahchahna Road Map sawiho a ni a.  Pu Benjamin Lalzama chuan BRU laklet hna chu sawrkar laipui Ministry of Home Affairs leh Mizoram State Level Core Committee (SLCC) te duh dan leh ruahmanna siam angin fimkhur taka kalpui a tul a ni, a ti a. Tripura Transit Camp atanga Lunglei District kawng a thui avangin ruahmanna mumal tak nen Department kaihhnawih te tha taka thawkho turin a chah bawk.

Bru laklet hna hi tha taka kalpui a nih theihna tur leh boruak ralmuang tak hnuaia hruai haw an nih theihna turin sum mamawh zat leh a hman dan tur, lirthei mamawh zat, venhimna buatsaih tul te, an hriselna lam buaipui, an chen lailawkna, an ei leh in tur ruahmanna, staging area leh tul dang hrang hrangte sawi ho a ni a. Department hrang hrang ten mawhphurhna insemin he hna kapui tura an inbuatsaihna kal mek sawiho a ni bawk. November 2016 thlenga Lunglei District-a BRU kir tur chhinchhiah zat chu chhungkaw 384 niin Lunglei District huamchhunga khaw pali (4) a sem darh tura ruahmanna siam mek a ni.

Nakum 2018 March atanga hruaikir hna thawhna turah hian Mizoram mi leh sa dik tak te hruai haw an nih theihnan endik hna hi nikum 2016 November thla khan  an awmna  hmuna kalchilhin neih a lo ni tawh a ni.