1441/2024-2025

Dated Aizawl, the 5th August, 2024: Vawiin khan Mizoram State Disaster Management Authority (SDMA) te chu an chairman Pu Lalduhoma, Chief Minister hovin CM Conference Hall-ah an thukhawm.

Chairman Pu Lalduhoma chuan, Cyclone Remal vanga chhiatna rawn endiktu Inter Ministerial Central Team ten an report an thehluh tawh thu leh Finance Ministry lama a awm mek thu a sawi a. Tanpuina engemaw zat chu min rawn pek kan beisei, a ti.

Meeting hian SDMA sum leh pai dinhmun report te, inkaihhruaina ang zela an hman chhuah thin dan report te an ngaithla a. Tun hnaia DM&R hmalakna te pawh ngaithlain Mizoram hmun paruka lirnghing tehna khawl (Seismic Observatory) dah mek a nih thu te, kumin March atanga May thla thlenga leilung chhiatna vanga chenna in leh building dang chhia 5938 report a awm tawh thu te leh kumin chhunga disaster avanga nunna chan chhinchhiah mi 42 an awm tawh thu te sawi a ni.

Meeting hian chhanchhuahna hmanrua leh leilung zirna tur hmanrua engemawzat lei an rel a. Hlimen leh Melthuma leiminin in leh lo a tihchhiatsak chhungkaw 41 te chen lailawkna tur siam a nih thute, Hlimen leh Melthuma hmun him tawk lova ngaih te umzui zel dan tur te an sawi a. Mihring chen tamna hmuna leimin thleng nasa thin tihnep nana tui luankawr leh thli paihdan mumal zawk zirtu tur study team din te pawh an sawi a ni.

Heng bakah hian African Swine Fever vanga harsatna tawk chhungkua te tanpui dan tur pawh sawiin; mumal zawka chhawmdawlna an hmuh theih dan tur ruahmanna siam ni se, an ti.

He meetingah hian Pu K. Sapdanga, DM& R Minister, Pu Vanlalhlana, PWD Minister, Pu C. Lalsawivunga, AH & Vety Minister, Pi Lalrinpuii, Health Minister, Prof. Lalnilawma, PHE Minister, Pu B. Lalchhanzova, FCS & CA Minister leh Dr. Renu Sharma, Chief Secretary, Pi K. Lalrinzuali Secretary, DM&R bakah members dang te an tel a ni.