1442/2024-2025

2024 Thlazing ni 5: Vawiin khan Lunglei District Level Co-ordination Committee for National Deworming Day chu an Chairman, District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm a. National Deworming Day (NDD) August Round 2024 kalpui dan tur an sawi ho.

Bawrhsap Pu R. Lalṭhazuala chuan kumin February thlaa Lunglei District-a rulhut hlo pek beihpui thlak (National Deworming Day) kalpuiah target 98.80% laiin rulhut hlo an ei chu lawmawm a tih thu sawiin, tun August Round lo awm turah hian naupang tam zawkin an ei theih nan thawktute chu theih tawp chhuah turin a chah a ni.

He hunah hian Lunglei District Immunisation Officer Dr K. Lalhmachhuana'n February Round-a NDD hman dan report pein, Hnahthial District chu medical lamah Lunglei District huam chhungah an la awm rih avangin NDD-ah pawh huam tel an ni tih a tar lang a. NDD August Round atana ruahmanna awm sate tar lang bawkin, member kal khawmte'n NDD 2024 August Round kalpui tur chungchanga thil pawimawh hrang hrang an sawi ho nghal a ni.

National Deworming Day hi kum tin vawi hnih, February thla leh August thlaah te hman ṭhin a ni a. Kumin National Deworming Day August Round hi August ni 9 aṭanga hman ṭan tura ruahman a ni a. Naupang kum 1 aṭanga kum 19 inkarte chu rulhut hlo (Tab. Albendazole) eitir vek tur a ni a. Naupang kum 2 hnuai lamte chu mum chanvea eitir ṭhin niin, kum 2 chung lamte chu mum khat pek ṭhin an ni a. Rulhut hlo hi zirna in leh anganwadi centre-ah te pek leh tura ruahman niin, chumia hmaihte chu an ina kal chilha pek leh turin ruahman a ni.

NDD 2024 August Round bul ṭanna leh hawnna hun hi August ni 9, 2024 (Zirtawpni) chawhma dar 11-ah Govt Mt Hermon Middle School, Ramthar, Lungleiah hman tum a ni a. Hemi ni hian Lunglei District leh Hnahthial District chhunga school, college leh anganwadi centre-ah te rulhut hlo inpek a nih dawn bakah, sikul kal lote chu ASHA te'n an inah kal chilhin an pe ang a. Target zinga tel si, hemi nia pek hman lohte tan August ni 16-ah Mop Up buatsaih a ni leh dawn bawk a ni.

NDD February 2024 round-ah khan Lunglei leh Hnahthial District chhunga target mi 58,462 aṭangin mi 57,761 chu rulhut hlo pek niin, hei hi 98.80% a ni a. Kumin NDD August round-a rulhut hlo pek tur atan hian Lunglei leh Hnahthial District chhungah kum 1 leh kum 19 inkar target 60,532 an awm a ni.