Vawiin tlai khan Chief Minister Pu Lal Thanhawla hovin Board of Management for Establishment of Mizoram State Medical College a member-te leh invitee te chu Chief Minister's Cabinet room ah an thukhawm a. Nakum August thla a hawn hman beisei, State Medical College, Falkawn chungchang bika thil pawimawh hmasa te leh a tahtawla hmalakdan tur chungchang te an rel a ni.

State Medical College Board of Management ah hian Chief Minister Pu Lal Thanhawla Chairman a ni a. Pu Lal Thanzara, Minister, Health & Family Welfare,etc., Dr. B.D. Chakma, Minister of State, Pu K.S.Thanga, Parliamentary Secretary, Chief Secretary Pi L.Tochhong leh Prof. R.Lalthantluanga, Vice Chancellor, Mizoram University te chu member niin Health Department Principal Secretary Pu R.L.Rinawma chu Member Secretary a ni a. Dr.N.K. Mohanty, Adviser to Goverment of Mizoram leh Dr.K.Ropari, Principal Director, Health & Family Welfare te chu invitee an nih angin an tel bawk.

State Medical Managing Board meeting ah hian College hming tur chungchang, bul tanna atana Doctor zir turte lakluh tum zat te, Medical Council of India duhdan ang thlapa zirtirtu leh zirna bakah zirna in leh laboratory kalpui dan tur chungchang te, Medical Director ruatna kawnga thil tul hmasa chungchang, non-teaching staff chungchang, College building a room hrang hrang sak dan tan tur te leh State Referral Hospital, Falkawn a kan neih mek Teaching Hospital a tih changtlun dan tur te sawi ho a ni a.

College hming thlak na tur hian Mizoram Institute of Medical Education and Research(MIMER) chu Advisory Committee in a rawtna anga pawm a ni a. Chief Minister pawh in College hmingah chuan buaina emaw harsatna a awm a rinloh thu leh Medical College tha tak a nih theih phawt chuan a lungawi thlak tur thu a sawi a ni. Medical College hi nakum August thla chhungin hneh taka enkawl theih tur seat 50 chiah la a First semester bul tan tum a ni a.He medical College in hmasawn dan azir in Seat 50 atang hian Government of India in a phalsak zat, seat 100 thlenga tihpun a la ni dawn a ni. State Referral Hospital, Falkawn in a dawl chin khum 300 hmang hian MIMER hi bultan pui a ni phawt anga khum 500 thleng a la tihpun leh tura ruahhman a ni.

Attachment

  • Loading attachment...