Nagaland Civil Service(NCS) 2012 Batch -a Officer 16 rual te chuan an Probation training chi khat atan Mizoram-in Inthlan a kalpui dan rawn zir turin nimin khan Aizawl an lo thleng a. Vawiin chawhma khan Administrative Training Institute(ATI) heng officer rual te hian Joint Chief Elector Officer hmasa leh tuna School Education Department Director ni ta Pu H. Lalengmawia, IAS in Mizoram-a inthlan kalpui dan chungchang ‘Elections in Mizoram’ tih thupui hmangin presentation a siam a, Mizoram-in inthlan a lo kalpui dante, tlawmngai pawl hrang hrang te nena thawhhona a that avanga inthlanna fel leh fai a awm theih dante leh khua leh tui dik tak ten inthlan an ngaihpawimawh avanga vote thlak that dan chanchin te ngaihnawm takin a sawi a ni.
He inkawmhona hi ATI Director Dr. Lalrozama, IAS chuan kaihruaiin Nagaland Sawkar in a hnuaia thawk tura a lak officer te election chungchang zir tura a rawn tirh chu lawmawm tiin he hi Mizoram tan chuan a chhuanawm hle thu sawi a. Hun lo kal zel turah pawh Nagaland leh Mizoram Sawrkar leh mipuite inkarah inlaichinna tha leh thawhhona duhawm tak a thlen ngei a beisei thu a sawi bawk.
Naktuk khian NCS officer te hi DRDA Aizawl leh BDO Tlangnuam te ruahmanna in Lengpui leh Sihmui a Rural Development Department hmalakna thenkhat an tlawh bawk ang.
ATI hi Mizoram Sawrkar hnuaia Service hrang hrang te training leh intuaihriamna hmunpui ber a ni a. Sawrkar officer leh Sawrkar hnathawktu dangte tan pawh training chi hrang hrang an buatsaih thin a ni.
