Mizoram Civil Service Association (MCSA) chuan vawiin khan Assembly Secretariat Conference Hall-ah DP & AR leh MCSA buatsaih ‘Towards citizen centric administration”tih thupui hmangin workshop an nei a. He workshop hi Pu R. Lalzirliana, Home Minister chu khuallian niin a hmanpui a ni. Pu Lalzirliana, Home Minister chuan MCS ten workshop buatsaih nachang an hria chu lawmawm a tih thu a sawi a. Sawrkar Department hrang hrang ah MCS te an tam ber avangin taima tak leh thahnemngai taka thawk turin MCS te a fuih a. Sawrkar department hrang hranga neitute pawh MCS officer te an nih thu a sawi a ni.

Chawhma session ah hian Rural Development - Enhancing rural livelihoods tih thupui hmangin Pu R. Lalvena, IAS, Secretary, Food Civil Supplies and Consumer Affairs etc. chuan Mizoram a RD Scheme kalpui dan chungchang leh Convergence of MGNREGA and other schemes chungchang paper a buatsaih an zirho a. Pu Johny T.O., MCS retired pawhin Mizoram a National Rural Livelihood Mission chungchang presentation a nei a. Chawhnu session ah Roles and responsibilities of Executive Magistrate tih thupui hmangin Pu Kunal, IAS, Addl. Commissioner, Sales Tax, Govt. of NCT, Delhi chuan paper presentation a nei bawk a. Heng presentation te hi MCS officer te leh Resource Persons ten sawihona leh zawhna leh chhanna an nei nghal a ni.