Hmeichhia te hmasawnna tura hmala tu Mizoram State Mission Authority Meeting vawi 2-na chu vawiin chawhnu dar 1:00 khan CM Conference Room ah Chief Minister Pu Lal Thanhawla hovin an thukhawm a, Mizo hmeichhia te dinhmun chawikan leh tihhmasawn nana Sorkar department hrang hrangin hma an lakna te pheikhai rual taka thawh a nih theih nan leh an thawhsak hmeichhia ten anmahni hamthat nana department hmalakna te an lo hriat tlan theih nan chak taka hmalak chhoh ni se an ti.

Kum 2010-a Sorkar Laipuiin The National Mission for Empowerment of Women a din hnuaiah National leh State Mission Authority te hi din a ni a, SMA chuan hemi kawnga hma la tur hian State Resource Centre for Women Office pawh ni 15 April 2013 khan a din fel tawh a, thawktu 7-in an enkawl mek a ni. Hmeichhia tanpui ngaite enkawlna hmun One Stop Crisis Centre for Women atan Aizawl Civil Hospital thlan fel a ni tawh a, Lunglei leh Kolasib ah te OSCC din tur hian dilna thehluh a ni tawh bawk. Heng Project dinna tura sum ruahman Rs 35 lakhs chu Ministry of Women & Child Development tum tur a ni. SMA hian hmeichhe dinhmun chawikan nan leh tihhmasawn nan hriselna chungchang te, dan leh hrai lama hmeichhe chanvo te, hmeichhe chunga hleilenna te, mahni intun nunna tur kawngte leh Mizo hnam nuna hmeichhia te dinhmun chungchang zirhona te a buatsaih thin a ni.

Vawiina SMA meeting chuan kum khat chhunga hmalak dan tur ruahmanna Annual Action Plan an thlir ho va, hmeichhia te hamthatna tura department hrang hrangin hma an lak mekna te chu inhre tawna, rualkhai leh chak zawka kalpui a nih theih nan, department kaihhnawih aiawh tel vekna tur Convergence Forum dina hmalak ho dan tur te an rel a, an thawhsak hmeichhia te ngeiin an hriatchian tlan theih nan uar zawka inhrilhhriatna (awareness campaign) buatsaih dan tur te an ngaihtuah ho bawk. Hetianga hmeichhia te chawikanna leh tihhmasawnna tura hmalakna atana sum senso turah Sorkar Laipuiin State Sorkar te 10 % lo tum ve tura a ngenna chu vawiina Mizoram SMA meeting chuan tihhlawhtlin dan zawn ni se tiin a rel bawk a ni.

Vawiin Mizoram SMA meeting ah hian Convener Pu P.C.Lalthanliana, Social Welfare Minister, Pu R.Lalzirliana, Home & RD Minister, Pu R.Romawia, H&TE Minister, Pu Zodintluanga, UD&PA Minister bakah Pi C.Zothankimi, Chairperson, Mizoram State Social Welfare Board leh Social Welfare Department hotute an tel a ni.