Association for Environmental Preservation (ASEP) General Headquarters, Aizawl hruaitute chuan February ni 18, 2014 khan Aizawl Zoological Park chu a vawikhatna atan an tlawh a. A tul dan ang zela tlawh a, siamthat ngai awm nia an hriatte thuneitute hnenah thlen nise an ti. Hei hian hun lo kal zel turah rah tha a chhuah an beisei thu an sawi. Sahuan tha leh ngaihhlut tlak kan neih theihnan ASEP chuan theihtawp chhuah zel a tum a ni.

ASEP President K. Lalmuansanga chuan, “Sahuan hi nungcha humhalhna hmun pawimawh leh mihringten awlsam zawka ramsate kan hmuh theihna hmun a nih avangin a pawimawh a, ram hmelhmang lanna hmun pawimawh tak pakhat a ni,” a ti. Sahuan tlawhtu apiangte dimdawi leh nungcha hmangaihna thinlung tak tak nena tlawh thin turin a ngen a ni.

Tun dinhmunah Sahuan hmunhma leh in pindan dan te leh a enkawl dante duhthusam thlap ni lo mahse ramsa awm ang angte erawh an hrisel tha nia a lan avangin ASEP chu a lawm a. Breeding Centre a nih anga nungcha awm thenkhatte tha taka an inthlahpung thei chu ASEP chuan lawmawm a ti hle a. He sahuan hi Mizoramin kan neih chhun liau liau a nih avangin thuneitu lamte pawhin tun aia tha zawka enkawl tur leh Zoram mipuite pawhin hlut thiam theuh turin ASEP chuan a ngen a ni.