Vawiin khan Mizoram State Olympic Association (MSOA) Executive Committee chu an President, Chief Minister Pu Lal Thanhawla hovin meeting neih a ni. Sr.Vice President, Sports Minister Pu Zodintluanga pawh he meeting-ah hian a tel a ni.

Meeting hian kum hmasa lama Association hmalakna hrang hrangte thlirho a nih hnu in, kumtina International Olympic Day  lawm thin chu kumina Mizoram a hman dan tur ngaihtuah zui a ni a. June ni 18-22 chhunga hman dan tura ruahman a ni.

Karate Association in MSOA affiliation an dilna chu ngaihtuah niin, Executive Committee chuan an dilna chu a pawmpui a ni. Heng bakah hian Mizoram State Olympic Association General Election neih hun te sawiho a ni bawk.

Vawiin meeting-ah hian Mizoram State Olympic Association member te an kal thahnem hle a ni. Tun dinhmunah MSOA-ah hian Sports Association 17 an awm mek a ni.