2734/2025-2026

Aizawl the 19th December 2025: Vawiin khan Chief Minister Pu Lalduhoma kaihhruaiin Mizoram State Level Police Conference on Debriefing of DGs/IGPs Conference chu DGP Conference Hall, PHQ, Khatlaah neih a ni a. Pu K. Sapdanga, Home Minister pawhin a telpui.

He conference hi kumin November thlaa Raipur, Chhattisgarh-a Prime Minister Pu Narendra Modi kaihhruaia 60th National Level DGP/IGP Conference neih zawh tak bawhzuina a ni.

Thusawiin Chief Minister chuan, National Level DGP/IGP Conference neih zawh takah khan India rama police te hmasawnna tur rawtna chi hrang hrang 107 siam a ni a. Vanneihthlak takin khang rawtna zingah khan Mizoramin a taka kan lo kalpui tawhte an awm a. Rawtna dangte pawh a theih anga tihhlawhtlin kan tum ang, sorkar laipui tanpuina pawh kan mamawh viau dawn a ni, a ti.

Kum hnih chhunga Mizoram Police hmalaknate fakin, an thawhrimna zarah ruihhlo a tawmim hle a. Tihrem vek chu harsa rih mahse a supply lam a tlahniam nasa a ni. Kuhva ro tawlhruk dona lamah police ten an thawh that avangin Mizoram chanchina kan Kuhva tharchhuahte hralh that ber kum a thleng mek a ni, tiin police leh an thawhpuite hnenah lawmthu a sawi a.

Police Modernisation Scheme atan tun hnaiah Rs. 3.18 crore kan hmu a, a belhna (additional) fund hi Rs. 21.276 crore min pawmsak leh tawh a. Police mamawh tam tak kan lei ang a, bullet proof car pawh pathum lei kan tum a ni. He fund kan hmuh theih nan hian DGP Pu Sharad Agarwal a thawkrim hle a, a chungah kan lawm hle a ni, a ti a. Mizoram sorkarin police te hmasawnna tur ruahmanna a neih tlangpui a tarlang a. Chung zinga a langsar chu India dan thar BNSS Act 2023 in a phut anga Directorate of Prosecution dinna tur Notification, tun hnaia tihchhuah tak kha a ni.

Chief Minister hian, National Police Conference rawtnate zingah kan umzui ran ngai a awm thei a. Kan sum leh pai dinhmun a zira kan bawhzui theih nan ngaihpawimawh hmasak tur thliar ni se a tha ang, a ti bawk.

Home Minister Pu K. Sapdanga pawhin thusawiin, police hna chu misual hrem tuma beihna a ni ringawt lova, vantlang nun him leh ralmuang siamna a ni zawk a. Tun hma atanga dan bawhchhiatna pangaite vil reng chunga dan bawhchhiatna tharlam leh tunlai ber ber hmachhawn thei a kan inbuatsaih a ngai bawk, a ti a. Police te hnathawh tha tak takte avangin lawmthu a sawi a ni.

He Conference-ah hian Pu Sharad Agarwal, DGP chuan National Conference neih zawh takin rawtna a siamte chipchiar taka sawifiahna a nei a. National Conference hian Viksit Bharat 2047 tin zawnin ram chhung venhimna kalpui dan tur (Roadmap) a duang a, police hnathawhnaa tunlai thiamna changkang ber berte hman tangkai dan tur te, khuarel chhiatna hmachhawn kawnga inbuatsaihna tha zawk te, hmeichhiate himna atana technology hman tangkai thute leh khawvel politics inthlak chho zel (Geo political challange) hmachhawn thei tura inbuatsaihnate pawh sawi a nih thu a tarlang.

National Police Conference rawtna ti hlawhtling tura Mizoram police department ten mamawh an neih hrang hrangte pawh a tarlang nghal a ni.

Meetingah hian Pu Vanlalmawia, Home Secretary bakah Mizorama venhimna lam thawktu central leh state agency zawng zawng thuneitute an tel a, district tina Superintendent of Police ten online-in an zawm bawk a ni.

Pu C. Lalnunmawia, IPS, DIG (Hqrs) chuan lawmthu sawiin meeting hi a khar a ni.