2735/2025-2026
Pangbalkawn, December 19, 2025 : Nimin , December 18, 2025 khan Pangbalkawn OM OM Rice Mill-ah Mizoram Sawrkar chuan kumin atana a vawi khat nan kumin a buh thar chhuah a lei khawm hna a ṭan.
District Agriculture Officer Pu Joseph Lalnuntluanga hnen aṭanga report dawn danin, nimin khan Kolasib District chhunga leilet neitu mi pali (4) te hnen aṭangin Buhhum thar Quintal 164.15 lai buk a ni a. He buhhum lei hi vawiin, December 19, 2025 thleng chhunzawm a ni ang a, vawiinah kumin atana buhhum thar lei chu khar rih tura ruahman a ni.
Kum kalta khan Mizoram Sorkar chuan Mizoram Agriculture Marketing Board (MAMB) kaltlangin Kolasib leh Mamit District chhunga buhhum thar eng emaw zat chu Kg khatah Rs. 30/- zelin a lo lei tawh a. Kuminah pawh hian Sorkar ruahmanna angin buhhum lei hi chhunzawm leh niin, Kolasib leh Mamit District chauh ni lo, hmun dang aṭang pawha lei turin Sorkar chuan inbuatsaihna a nei mek a ni.
Kumin April 2025 khan 2024 a thar chhuah te sawrkar hian a lei tawh a, tuna a lei hi kumina buh thar te an ni.
