282/2025-2026

Aizawl the 23rd April 2025: Vawiin khan Chief Minister Pu Lalduhoma hovin Mizoram State Policy Coordination Committee te chu CM Conference Hall-ah an thukhawm.

Bana Kaih thawh khatna (Pilot phase) hmanga progress partner thlan chhuah te hmachhawp an sawi a. Loan Component-a progress partner tur te hi thlan fel an ni deuh vek tawh a, training te pawh an kal tawh hlawm.Thawhpui Bank te Annual Closing Audit zawh fel hnuah an loan hi process tan theih beisei a ni a. Sanction mai theih te pawh a awm tawh a ni.

Chief Minister special package, pilot phase hnuaiah hian progress partner mi 1740 vel pek theih tura ruahman a ni a, line department te chu allocation siamsak vek an ni. Progress partner ten tanpuina an dil zat a zirin a dawng thei zat hi an danglam hlek hlek thei a, June thla velah sem tan hman beisei a ni.

Gredit Guarantee Fund Trust for Micro and Small Enterprises (CGTMSE) leh Commerce & Industry ten February thla khan Memorundum of Understanding an ziak fel tawh a, a kalpui dan tur zirhona workshop hi May thla chawhma lamah neih tum a ni.

Monitoring lama hmalak dan tur te, I&PR kal tlanga publicity and documentation chak tak kalpui dan tur te pawh sawi a ni.