Vawiin khan Chief Minister Pu Zoramthanga chuan CM's Conference Hall-ah State Mission Director Pu Lalthangliana Murray, National Bamboo Mission leh a thawhpuite hmu in Mizorama Bamboo Mission kalpui dan leh hmalak zel dan tur an sawiho.

Chief Minister chuan mau a innghat industry hrang hrangte pawh Mizoramah awm tawhin, an thil siamchhuah Mizoram pawna thawnchhuakin mau chu eizawnna kawng tha tak siam theihna, environment tana thilpawi ni silo a nih thu a sawi a. Chutihrual chuan industry a hman theih chi mau quality tha tam tham tak tharchhuah a tul thu a sawi a ni.

State Mission Director Pu Murray a chuan Mizorama National Bamboo Mission kalpui a nih dan leh hmachhawp awmte sawiin, sawrkar laipui kalphung a duan ang chiah chiaha state tin te kal tura beisei a nih avanga India hmarchhak tlangram state ten mau hmun siam kawngah sum pek duh angin an khawpkhamloh thu te a tarlang a. 2018-2019 chhunga hmalakna tur duan saah mau tharchhuah tipung tura beihpui thlak bakah a khawl tha lakluh te, godown leh warehouse sak belh te leh pawimawh dang a tel thu te, NBM chuan branding leh marketing atana puihna pek te, mau atanga lehkhapuan leh thuamhnaw puan leh fuel siamchhuah ah hmalak a tum thu a sawi bawk.

SFR 2017 report a a lan dan in tunah hian Mizoram pum 15.49% chu mau hmun niin, chu 3,267 sq.km a zau a ni a. Reserved Forest area a mau awm zawng zawng zat hi maktaduai 716 a chhut a ni.