Vawiin khan Mizoram College of Teachers' Association, Govt. Aizawl West College Branch te lehkhabu siam "Selected Issues of Current Trends in Mizoram" tih chu I&PR Minister Pu Lalruatkima'n Govt. Aizawl West College Auditorium ah a tlangzarh

Lehkhabu tlangzarh paha thu sawiin I&PR Minister chuan a bial chhunga College awmchhun Govt Aizawl West College a Mizoram College Teachers' Association ten lehkhabu hlu tak tlangzarh theih a an buatsaih chu lawmawm a tih thu a sawi a, Mizoram a tunlai a thilthleng leh kan hmachhawn tur pawimawh zual te behchhana thupui hrang hrang hmanga an ziak chu zirlaite leh research scholar te tan pawh la tangkai tak anih a rin thu a sawi.
Minister chuan thiamna sang zelah technology a thang chak em em a, social media a chak bawk si a hei hian lehkhaziak chhiar taimak kawngah nasa takin min tihnufum ta a, zirlaite leh mipui mimir hian lehkhachhiar hi kan uar thar leh a ngai a, social media a lar hnu hian kan mizo tawng dik pangngai duhlian tawng hian nasa takin a tuar a, hei hi tan kan lakna tur ani tiin lehkhabu ziah leh chhiar uar kawnga hmasawn bakah mizo tawng ziah dik kawnga tan lak thar a tul takmeuh thu a sawi a ni.
Minister chuan ramchhung leh tualchhung rorelna ah thuneihna insemzai (decentralisation) hi sawrkarin a ngaipawimawh a, Gender issues hrang hrang women empowerment leh a dang te pawh ngaipawimawhah a nei dawn a ti a, College in hmasawnna tura hmachhawp hrang hrang a neih te pawh alo hriat ve thu sawiin heng atana an mamawh hrang hrangte bakah college building thar sakna tur hmun zawn chungchangah te sawrkarin a theih ang anga puih  a hrehlo a ni a ti bawk.

College Principal Pu P.Lalremliana pawhin kum 2022 ah re-accreditation assessment an hmachhawn dawn a, chutih hunah chuan tuna an lehkhabu tlangzarh hi a pawimawhzia a rawn lang dawn a ni a ti a, I&PR Minister chu an College dintirh atanga Minister zinga Chief Guest ni a an College hun pawimawh hmanpuitu hmasa ber leh la awmchhun anih thu a sawi a ni.

"Selected Issues of Current Trends in Mizoram" hi Govt. Aizawl West College, Mizoram College Teachers' Association Branch member 11 ten an zirbingna kawng hrang hrang a article 11 an ziah te an tarlanna a ni a, avai hian saptawnga ziah niin phek 206 a chhah a ni a, lehkhabu dawr hrang hrangah Rs 200/- a lei theih ani ang.

Vawiin lehkhabu tlangzarh inkhawm hi Dr. Vanlalvena Hnamte, President, MCTA Govt. Aizawl West College Branch in a kaihruai a,
Dr. Benjamin Lalrinsanga, Asst. Secretary, MCTA Govt. Aizawl West College Branch in report pe in, Pu H.Lalvulliana, Vice-President, MCTA Govt. Aizawl West College Branch in lawmthu sawina hun hmangin hnu a khar a ni

Attachment

  • Loading attachment...