Nimin chawhnu khan chhiatrupna thlen thulha invenna leh hemi kawnga thuneitu Committee sang, Chief Minister kaihhruaina hnuaia din leh Minister engemaw zat Member nihna - Mizoram State Disaster Management Authority (MSDMA) chu Chief Minister Pu Lal Thanhawla hovin CM Conference Hall-ah an thukhawm. MSDMA thutkhawm vawikhatna ah hian Member Home Minister Pu R Lalzirliana; Finance Minister Pu H Liansailova; PHE Minister Pu S Hiato; Health Minister PuLalrinliana Sailo; UD & PA Minister Pu Zodintluanga; LAD Minister Pu P C Lalthanliana; DMR Minister Pu Nihar Kanti Chakma leh Chief Secretary Pu Vanhela Pachuau IAS te an tel a ni.

Meeting-ah hian Disaster Management & Rehabilitation Department in rawtna a siamte sawihova,pawm vek a ni. An pawm tak te chu - Mizoram State Disaster Management Policy; chhiatrupna laka inven dan tur chungchang hrang hrang Mizoram Urban and Regional Development Act 1990 leh Aizawl Development Authority Act 2005 a telh belh rawtna te; Mizoram Urban & Regional Development Act 1990, District khawpui zawng zawnga hman ve; Police Battalion zawng zawnga State Disaster Response Force Unit din rawtna te; Sakawrtuichhun a 5th IR Police hmunpui chu State Disaster Response Force training na hmun atana siam rawtna te a ni. Chhiatrup thlen thulha senso namen lo a awm thin avangin hemi phuhruk nan hian Department tinah January thlenga an Plan sum atangin za a pakhat (1 percent) dah hran thin nise tih chu pawm a ni bawk. Zirna in hrang hranga School Safety Plan leh Safety Drill chak zawka kalpui te chu nimin meeting ah hian rel a ni bawk.

Meeting kaihruaitu Chief Minister Pu Lal Thanhawla chuan Mizoram chu chhiatrupna thlen mai theihna hmun a awm kan nih avangin hemi lam kawngah hian mitin in an beng chhit a, in ral ring renga kan awm a pawimawh zia a sawi a. Khawpui chhung hmun rualremlo tak taka in sak thin te chu uluk zawka vil a, enzui pawh a tul thu meeting hi a hrilh a ni.