Vawiin khan Chief Minister Pu Lal Thanhawla, President, Mizoram State Olympic Association ni bawk kaihhruaina hnuaiah Synod Conference Hall-ah Mizoram State Olympic Association, Executive Meeting neih a ni a.  Meeting ah hian Parliamentary Secretary Pu Hmingdailova Khiangte bakah Sports Association hrang hranga hruaitu te an tel a ni.

MSOA President Pu Lal Thanhawla chuan Mizoramin infiamna sports discipline hrang hranga India ah hriat a hlawh chho mek leh khawvel leh rampum huapa Mizo infiammi ten an hming an chher chho mek chu lawmawm a tih thu sawiin hei hi State Level Sports Association hrang hrangte inpekna leh infiammi thawhrimna vang a ni, a ti a. Kawng hrang hrangin infiamna lamah hmasawnna chu awm mahse hma sawnna tur kan la nei teuh a ni, a ti a. Mizoramin infiamna chi hrang hrangah theihna leh talent a nei a ni tih chu ram pumin a hre chho mek a, Football ah phei chuan Football factory tih hial khawpin Mizoram hming hi a thang mek tih a sawi a. Sports Association hrang hrang te chu tha thlah lova, tang tlanga Mizoramin infiamna khawvel ah hming a chher chhoh zel theih nan theihtawp chhuah chhunzawm zel turin Sports Association hrang hrang hruaitute chu sawmin a chah a ni.

Meeting ah hian MSOA Secretary General Pu C. Laltlanthanga’n kum kaltaa MSAO hmalakna te sawiin Secretary General Report a tarlang a; Treasurer Dr. Lalrinawma Hnamte in pawl sum dinhmun sawiin Financial Report an pharh a, hengte hi meeting a sawiho anih hnuin pawm a ni.

Meeting ah hian June ni 23 a International Olympic Day 2017 hman dan chungchangte, kum 2017-2018 chhunga MSOA Budget chungchangte leh 2018 a Asian Games, Youth Olympic Games leh Commonwealth Games atana inbuatsaih leh hma lak dan tur changchang pawh chipchiar leh zau taka sawiho a ni.

2018 Commonwealth Games, Asian Games leh Youth Olympic Games ah te hian tel thei (probables) an awm leh awm loh Association zawng zawng zawh ni se, an lo awm a nih chuan nasa zawk a players-te chu tanpui nise, meeting chuan lo thlifim (screening) turin Committee din a rel a. Chairman ah Pu Zoliana Royte ruat niin Pu C Laltlanthanga, Dr Lalrinawma Hnamte, Pu Lalnghinglova Hmar, Pu K Biakthianghlima, Pu Lalbiakzama leh Dr Rualkhuma Colney te chu Member atan ruat an ni.

Olympic Day ah hian Radio, TV ah te Discussion neih tum ni se tia rel a ni bawk. 

Mizoram State Olympic Association hi kum 1986 ah Aizawl ah din a ni a, Indian Olympic Association hnuaiah affiliation tiin International Olympic Committee a thlun zawm a ni bawk a. Tun dinhmun ah MSOA ah hian State Level Sports Association 16-in affiliation an nei mek a, chungte chu : Athletics, Badminton, Basketball, Boxing, Football, Hockey, Judo, Table Tennis, Tennis, Taekwondo, Volleyball, Weightlifting, Wrestling, Rifle, Fencing leh Archery te an ni.