Regional Directorate of NSS, Guwahati, Ministry of Youth Affairs and Sports, Government of India leh State NSS Cell, Mizoram, Sports and Youth Services, Government of Mizoram te tangkawpa buatsaih ‘Training on Life Skills, Leadership and Personality Development’ chu Lunglei West bialtu MLA Pu Chalrosanga Ralte chuan vawiin tlai khan Lunglei Govt. College-ah a hawng.   

Pu Chalrosanga Ralte chuan NSS Volunteer-te chu an nuna harsatna hrang hrang an tawh chhoh tur thu sawiin, taimakna leh tumruhna tello chuan a dinchhuah theih loh a  ti a. Nu leh pa te thlazar hnuaia an awm loh hunah pawh, mahni kea ding chhuak tur chuan mahni theuh kan pawimawh a ni, a ti. An puala training buatsaih a ni chu an vanneih hle tiin, an thil zir turte chu an la hman tangkai tur a nih avangin  thinlunga vawng reng turin a chah bawk a ni. 

Pu R. Lalrochama Associate Professor, Lunglei Govt. College leh Programme Officer ni bawk chuan he hawnna inkhawm hi a kaihruai a. Principal Pi Lalhmangaihi Hrahsel pawhin he training buatsaih tura sum leh tha tam tak sen a ngai tiin, chhawr tangkai ngei tuma rilru siam turin zirlai naupangte a chah a ni. 

Pu Anup Dutta Baruah, P.O., NSS, Dimoria College, Assam chuan he training-in zirtir a tum leh course chhunga an zirtur te sawizauna a nei a. Dr. Zirlianngura, State NSS Officer cum Deputy Secretary NSS Cell, Mizoram chuan lawmthu sawina in hun a khar a ni.