No.5887/2020-2021

8.10.2020: Vawiin khan Chief Minister Pu Zoramthanga hovin a pisa ah National Infrastructure Pipeline (NIP) project chungchang Planning Department hotute nen sawiho a ni a. Deputy Chief Minister Pu Tawnluia pawh a tel a ni.

Vawiin meeting-ah hian National Infrastructure Pipeline (NIP) hnuaia Mizoram tana project hrang hrang ruahman leh hmalak dan tur sawiho a ni a. NIP hi India sawrkarin kum 2019 khan bultanin, hmasawnna ruhrel liantham leh tluantling ram puma siam a nih theih nan kum nga chhunga thawh turin Rs. 102 lakh crore he hmalakna atan hian sanction a ni a. Energy, roads, railways leh urban infrastructure hi ngaih pawimawh zual niin, he hmalaknaah hian centre leh state ten 39% ve ve share neiin private sector in 22% share an nei thung a ni.

Planning Board Vice Chairman Pu H. Rammawi, Chief Secretary Pu Lalnunmawia Chuaungo, Additional Chief Secretary Pu J.C Ramthanga, Planning Commissioner & Secretary Dr. Vanlalramsanga leh Planning Department Principal Adviser -cum- Additional Secretary Pu Lalrinkhuma Sailo te an tel a ni.