Vawiin chawhnu khan New Secretariat Conference Hall-ah Chief Minister Pu Lal Thanhawla, Chairman Mizoram State Planning Board nibawk kaihhruaina hnuaiah New Economic Development Policy (NEDP) kalpui dan tur sawihona High Level Meeting neih a ni a. He meeting pawimawh takah hian Home Minister Pu R. Lalzirliana; Finance Minister Pu Lalsawta; Vice Chairman, Mizoram State Planning Board Pu H. Liansailova; Cabinet Minister leh Minister of State te; Parliamentary Secretaries te; MLA (Corporation, Board leh Commission-a Chairman te); Chief Secretary leh mi pawimawh dang te an tel a ni.
Chairman leh Chief Minister Pu Lal Thanhawla chuan New Economic Development Policy chuan Mizoram tan hmathlir fel tak a nei a. Ram leh hnam hmasawnna hna reng reng (Schemes /Projects /Programme) chu Mizo mipuite rilrem zawng (practical), mitin huap, mitin hlawkpui tur leh tupawh tel theihna (holistic & inclusive) leh hun rei tak thleng hmasawnna chak taka kalpui theihna atana kaihhruaina (guiding principles) leh hmathlir (vision) nei a ni a ti a. NLUP atanga hlawhtlinna hrang hrang hmu ten nasa zawka hmasawnna atana ke a pen theihna hmanrua a ni bawk a ti.
Chief Minister chuan ram hmasawnna atana hnathawh dan tha zawk kawng kawhhmuhna leh hlawk zawka thawh dan tur ruahmanna te, infrastructure leh assets kan neih mek hlawk zawk a hman leh enkawl dan mumal tak ruahmanna tur te, sawrkar sum dinhmun siam thatna leh dik leh fel zawka hman dan tur ruahmanna te, Mizoram chhunga sumdawnna leh thil tharchhuah hlawk taka kalpui anih theih nan a ruahman te, mipui te tana sawrkar rawngbawlna leh hnathawh chak zawk leh daihzai zawka siam tur a ruahmanna te, Mizo mipuiten thiamna tak tak eizawnna tlak an neih theih nan a hmalak te, sik leh sa inthlak danglam nasa lutuk atanga chhiatna thleng thei laka invenna leh Sawrkar hnathawh dan leh hnathawk te, hlawk leh inrenchem zawka kalpui anih theihnan a ruahmanna siam te New Economic Development Policy chuan a huam vek a. Hetiang taka huam zau leh economy a nghawng (impact) nei lian tur anih avang hian Comprehensive Growth Strategy tih a nih thu a tar lang bawk.
Chief Minister chuan he Policy tihhlawhtlin a nih theih nan hian sector hrang hranga policy awmsa ennawn leh duan thar te, hmathar lakna tur ruahman te, kalphung awmsa paih leh thiah a, a thar duan te, rorelna khauh zawk (hard choice) a tul anga kalpui te leh mipui te hmasawnna kawnga chak zawka an kal theih nan a cho chhuak zawng a hma lakna tur a ni tiin New Economic Development Policy tihlawhtling tur a tan tlan a ngaih thu leh lungrual taka hna thawh a tul thu a sawi a. A pawimawh dan ang zelin thutlukna (decision) harsa pawh ram tana tha tur anih phawt chuan siam hreh tur kan nilo tiin Policy tharin thil thar tha zawk a thlen theihnan a kan thawhna kawngah dodaltu an awm fo thin a. Chutiang hneh zel tur leh ram hmasawnna atana theihtawp chhuah zel turin Sawrkar hruaitute kan inbuatsaih a pawimawh a ni a ti.
Planning Board Vice Chairman Pu H. Liansailova leh Finance Minister Pu Lalsawta ten NEDP chuangchangah thusawina hun an nei a. Planning Secretary Dr C. Vanlalramsanga'n New Economic Development Policy chungchang kimchang takin presentation a pe bawk. Kal khawm ten sawihona hun tha tak an nei thei a. Lungrual tak leh chak taka New Economic Development Policy hlawhtlinnan a thawk theuhturinhmalak zel dan tur an sawiho a ni.
Hnathawh chak theih nana hmanraw pawimawh he NEDP pawhin a a chhawr nghal theih tur atan Administrative Reforms Committee hun reilote chhunga report thehluh tur din pawh remtih a ni.
