Nimin (2.6.2016) tlai dar 5 khan Lawngtlai District Deputy Commissioner Dr A.Muthamma chu Lawngtlaia Kaladan Multi Modal Transit Transport Project (KMMTTP) kawng laih meka ram neitu zangnadawmna phuta nawrh huaihawt mekte nen a office-ah an inbia a. An inbiaknaah hian Lawngtlai SP Pu Lalsanglura, Election Officer Pu Lalhmansanga leh DIPRO Pu C.Lalhruaitluanga te pawh an tel.

DC chuan ram neitute harsatna chu a hriat thiampui thu leh theihtawpa hma a lakpui tur thu a sawi a. Sum lamah chuan buaina a awm lo va, Revenue Department atanga ram finfiah ngai la awm chuan hun a la duh deuh bakah, district level atanga tihfel mai theih a nih loh avang leh Land Acquisition dan thar avangin thil a kal pur pur thei rih lo tih sawiin, ram neitute chu an nawrh titawp rih turin a ngen a. Amah ngeiin Revenue Secretary a dawr tur thu a sawi.

Lawngtlai Land Owners' Association hruaitute chuan DC-in theihtawp a chhuahpui avanga lawm thu an sawi rualin, sawrkar nawr nana an hma lakna, kawng siam hna thawktute dan erawh chu kal tlangpui zel an tum thu an sawi a. DC chuan mipui harsatna siam zawnga thil ti lo tura ngenin, ram neitute paw'n mipui harsatna thlen chu an hlauh ber a nih thu an lo hrilh ve bawk.