Nimin (2.6.2016) khan NLUP Implementing Board Chairman Pu J.H. Rothuama, Champhai South bialtu MLA, chuan a bial chhunga khaw pahnih, Melbuk leh Zokhawthar a tlawh a. Tunhnaia thlipuiin a tihchhiat, Melbuk Middle School leh Primary School building-te bakah MLA-LAD fund hmanga hnathawhte leh hmalakna turte a hmunah a en a, khawtlang hruaituten an harsatna hrang hrangte bialtu MLA hnenah an lo thlen a ni. NIB Chairman hi District Official engemawzatin an tawiawm a ni.

NLUP Implementing Board Chairman Pu J.H. Rothuama, Champhai South bialtu MLA hi Melbukah khawtlang hruaitute, zirtirtute leh tlawmngaipawl hotuten an lo dawngsawng a. Tunhnaia thlipuiin Melbuk Middle School leh Primary School building chung a tihchhiat te chu a hmunah tlawhin school building-te thawm thatna tur sawrkarin a peih tawh thu a hrilh a. NIB Chairman hian Melbuk High School pawh a hmunah a tlawhin an harsatnate a en pui bawk.

Zokhawtharah pawh NIB Chairman, Pu J.H. Rothuama, Champhai South bialtu MLA, hi khawtlang hruaituten lo dawngsawngin an khawchhunga MLA-LAD Fund hmanga hnathawh tawhte leh hmachhawpte a hmunah entirin an harsatnate an lo thlen a ni.

NIB Chairman, Pu J.H. Rothuama, MLA, chuan a bial mipuite chu sawrkar hmalaknate ngaichang thiam tura chahin mipui hmasawnna tura sawrkar hmalaknate tha taka tawiawm thin turin a sawm a. Mizoram Sawrkarin NLUP a kalpui hi mi retheite eizawnna bultanna mai bakah tunlai khawvelin a buaipui mek tih sawiin NIB Chairman chuan NLUP chu sik leh sa danglam zel venna kawnga tangkai tak a nih avangin UNO leh pawl hrang hrang pawhin an ngaihven hle a ni, a ti bawk.