Mizoram Larsap Lt. General (Rtd.) Nirbhay Sharma chuan nimin (2.6.2016) tlai khan a chenna Raj Bhavan-ah Mizoram a mihring hman tur tui thianghlim lâk leh sawngbawl dan (water management system) zirchiang tura Rajasthan atanga team lo kal hruaitu Rajasthan Minister of Rural Development and Panchayati Raj Pu Surendra Kumar Goyal nen inkawmna an nei. Rajasthan Minister hi Pu Mahesh Chandra Sharma, Rajasthan Administrative Service ami in a tawiawm a ni.

Rajasthan RD Minister chuan an lo kal chhan tlangpui sawifiahin, Rajasthan chu hmun ro anih avangin tui lamah harsatna an tawk thin a. Chumi sukiang tura hmalak dan thar ngaihtuah leh state dang tih dan te thlithlai turin an state atangin District, Block leh Village Level Panchayati Raj hruaitute leh Engineer thenkhat an lo kal thu a sawi a. Mizoram Governor pawhin Mizoram an lo kal chhungin hlawkna tur thil an chhar phah a beisei thu sawiin, state pahnih ten thawhhona tha tak an neih phah a beisei thu leh, rural development kalpui dan inzirsak tawn chu ?ha a tih thu a sawi a. Mipui tha leh thiamna (human resource) tihhmasawn kawnga hmalak chu state pahnih tan hian thil pawimawh anih thu sawi dunin, Mizoram chu ziak leh chhiar thiam kawnga ram pum huapa langsar a nih avangin tun aia nasa zawka chhawrtlak thiamna chherchhuah chu ram hmasawnna atan a pawimawh thu an sawilang a ni.

Rajasthan RD Minister hian vawiin hian LAD leh RD Department-a hotute kawmna hun a hman dawn bakah Aibawk RD Block-a hmalakna te a kaihhruai team ho hian an tlawh dawn bawk a ni.