Vawiin chhun dar 12 khan Assembly Annexe Chief Minister Office ah Chief Minister Pu Lal Thanhawla hovin NLUP meeting pawimawh tak neih a ni a, MIFCO kalpui dan tur chungchang te, Beneficiaries thar thlan dan tur te leh Agarbatti Stick trade chungchangte an sawiho.
NLUP kalpui chhoh mekah beneficiaries te thlan kim an la nih loh avangin thlan hmasak ten lo/ram tha an chang zela hriatna leh NLUP zaupui leh ram theh chungchangah harsatna a siam ni-a a lan avangin a bak beneficiaries la awm zawng 74,861 te chu thlan fel ni se tiin Meeting chuan a rel a. Lo/Ram pawh sem fel vek a, trade pawh a hma lama thlan feltira training pawh pek vek ni se. Sumin a daih vek rih dawn loh avangin chhawng hnih / chhawng thuma kalpui turin rel a ni bawk. Kum hmasa lama khaw tina beneficiaries zat bituk neiha lo kalpui tawh chu tun atang chuan Cluster zawnga bituk ni zawk se tiin rel a ni bawk. MIFCO chungchangah chuan harsatna hrang hrang avanga beisei anga hna a thawh theih loh avanga NLUP hnuaia thei chingtu ten hlauhthawn an neih chungchang chu ngun takin sawiho a ni a.
MIFCO harsatna hi reilote ah sutkian a nih theih nan MIFCO hnathawh dan tur ruahmanna siam turin Task Force, Pu P.L.Thanga chairman-na hnuaiah din a ni a, Industries leh MIFCO hotute an tel bawk ang. Kalphung tha zawk min buatsaihpui turin Joint Venture-a kalpui ni se tiin rel a ni bawk.
Agarbatti Stick siam chungchanga harsatna sawiho a ni a, he Trade thlangtute chu a rang thei ang bera Agarbati Stick siamna khawl pek ni se. Khawl siamtu tura Industries Department-in a lo ruahman tawh chu a tul anga bank lamah te hmalak pui ni se, Mizoram siamchhuah ngei Agarbatti siamna khawl chu a hma thei ang bera semchhuah a nih theih nan chak taka bawhzui zel ni se tiin meeting chuan a rel bawk a ni. Mizoram ah mau kan neih that avangin Agarbatti Stick siam trade hi hlawhtlin beiseiawm ber pawla ngaih a nih thu report dawn a ni bawk.
Vawiin Meeting ah hian Chief Minister bakah NLUP Nodal Minister Pu H.Liansailova, Rural Development Minister Pu R.Lalzirliana, Industries Minister Pu S.Hiato, NLUP Implementing Board Chairman Pu R.Selthuama, MLA, Finance Commissioner Pu Lalmalsawma, IAS, Industries Secretary Pu R.L.Rinawma, Finance Secretary Pu Lalthansanga, MIFCO Chairman Pu C.Lalruata, NLUP Implementing Board Vice Chairman Pu P.L.Thanga, NLUP Marketing Chairman Wng.Cmdr. Lalnghinglova leh Industries Director Pu Zothankhuma, IAS te an tel a ni.
