Vawiin chawhnu dar 1:30 khan NLUP Apex Board Meeting vawi 5 na chu Chairman leh Chief Minister ni bawk Pu Lal Thanhawla hovin CM Conference Hall-ah neih a ni a, Chairman Pu Lal Thanhawla chuan NLUP chu Congress Party manifesto-a lo puan chhuah tawh angin miretheite chhawmdawlna chauh nilovin department hrang hrang hnathawh dan kalphung siamthatna te leh Mizoram economy mumal taka a than chhoh theih nana ruahmanna puitling a ni, a ti.

Central sorkar-a NLUP sum mamawh tur zawng zawng kimchang taka hmuh a nih hnu hi chuan kum 2009-2010 ah NLUP bultanna atan Rs. 100 crores dah a ni a, sorkar leh a dawngtu tur te lamah inbuatsaihna changtlung zawk duh avang leh hlawhtling ngei tura kan duh avangin he NLUP sum hmasa hi state mamawh dang atan hman tangkai a lo ni zawk ta a ni, tiin a sawifiah. He NLUP ah hian hlawhtling taka beneficiaries ten hma an lak theih nan corresponding infrastructural support buatsaih tel a ni a, chuvang chuan heng a hnuaia department hrang hrangte hmalakna hi a ti changtlung nghal dawn bawk a ni. Fisheries lamah chuan sangha no mamawh 1% pawh kan thar loh laiin NLUP hnuaia hmalakna avangin kum 2011 atang chuan mamawh zat 4 crores kan thar thei nghal dawn a ni. Sericulture ah chuan Silk Cocoon Rs. 97.50 lakh man vel thar thin a ni a, kum 5 hnuah chuan Rs. 7968 lakh chuang man thar theih beisei a ni. AH & Vety hnuaiah chuan kum 2011 atang chuan vawkte no tha chi kum tin 30,000 vel kan thar thei tawh ang a,  kan artui mamawh 80% vel Zoram pawn atanga lakluh thin hi kum 2/3 chhunga kan mamawh thar thei tura hmalak mek a ni. Chutiang zelin Agriculture, Industries, Horticulture hnuaiah pawh eizawnna ngialnghet leh changtlung zawk, ram pawnlam mite pawn an hriat tham ni ngei thei turin NLUP hmang hian hma lak mek a ni.

NLUP hnuaia covergence sawi hian central sorkar atanga sum awmsa lakhawma NLUP hmang vuaha programme thar ruahman tumna mai a ni lova, kalphung thar siama eirukna leh a thlawna cheng vaibelchhe tam tak luanral thinna tih bona tur anih mai bakah, central sorkar atanga sum lut tur State Matching Share neih loh avanga kan chan fo thin hi a lo reh tawh ang a, sum tam zawk lutin kawng chi hrang hrangin Mizoram chuan a lo hlawkpui dawn a ni. He NLUP ah hian kalpui dan tur felfai taka ruahman a ni a, thingtlang khaw tina hmalakna hrang hrangte pawh Information Technology hmanga endik leh vil theih renga buatsaih tum a ni a, kawla ni chhuak chhiara Zokhaw kut hnathawktute tharchhuah pawh tunlai khawvel kalphung mila marketing system ruahman tel a ni bawk.

NLUP dawngtu tur thlan chungchangah pawh Village Level Committee ten anmahni khua theuh avanga NLUP hmu tlak ni a an ngaihte an thlang ang a, chu chu anmahni district theuha DC te hnenah thehluh a ni ang a. DC atangin NLUP Implementing Board ah thehluh a ni leh ang.

Meeting-ah hian NLUP kalpui zel dan tura thu pawimawh tak tak - mimal tanpuina leh infrastructure atana sum hman chhuah dan tur te, ram leilung enkawl dan tur te, a dawngtu tur thlan dan turte bakah thu pawimawh tam tak rel a ni a, hei bakah hian Executive Committee in thu a lo rel tawhte chu an thlir ho bawk.

Vawiin NLUP Apex Board Meeting hmang tur hian sorkar laipuia NLUP hlawhtlin theih nana theih tawpa hma lo latu Pu Brohmo Choudhury, Adviser, Planning Commission (North East) chu a lo tel thei a, thu tlem sawiin NLUP Scheme chu programme danglam tha bik tak anih avanga sorkar laipui chuan ngun taka ngaihtuaha a kalpui chhoh dante a sawifiah a, Ministry hrang hrangte rawn kualin Committee of Secretaries te chuan ngun taka ngaihtuahin he NLUP hi an pawm ta a ni.  Project lian tham leh pawimawh tak a nih avangin NLUP kalpui dan leh a dawngtu kuta bawhzui a nih dante thlengin Planning Commission chuan uluk leh chik taka a rawn vil reng tur thu a puang bawk. He NLUP hi mirethei leh chanhai zawkte khaichhuahna tura ruahman anih ang ngeia a hlawhtlin ngei an duh thu tarlangin, Pu Choudhury chuan hlawhtling taka kalpui a nih chuan India rampum atana hman zui tum a nih thute a sawifiah bawk.

NLUP hi September thla ah thawh tan (field implementation) turin Apex Board chuan a rel a, a kum khatna atan chhungkua a huam tur (cover) zat atana ruahman tawh sa chu sum awmdan a zirin tih pun theih tura rel a ni bawk. Chief Minister rawtna angin  convergence chungchanga hma lak dan tur sawi ho turin State Planning Board Vice Chairman Pu Lalkhama kaihhruaina hnuaiah Pu Brohmo Choudhury, Adviser Planning Commission (NE) hovin NLUP Nodal Minister Pu H. Liansailova, NLUP Implementing Board Chairman Pu R. Selthuama leh Chief Secretary te telin a kaihhnawih department Secretaries leh Head of Department te chu naktuk zing dar 9 hian State Guest House ah an thu khawm zui dawn a ni.