Vawiin khan Chief Minister Pu Lal Thanhawla, NLUP Apex Board Chairman hovin NIB conference hall-ah NLUP kalpui chhunzawmna kawnga ruahmanna siam thar ngai te thlirin High level meeting neih a ni a. NLUP Nodal Minister Pu R.Lalzirliana, State Planning Board Vice Chairman Pu H.Liansialova, NIB Chairman Pu J.H.Rothuama, Chief Secretary Pi L.Tochhong leh official pawimawh te an tel.

Vawiin meeting ah hian Chief Minister Pu Lal Thanhawla chuan NLUP atan hian a khawihtu department official ten dik taka thil kalpui turin tan an lak a ngai a, hemi rual hian trade thenkhat bikah hmanhmawh a tul hle a ni, tiin PRRS hrileng vanga vawkte a harsatna sukiang turin a rang thei ang bera hma lak a tul tih a tarlang a. Vawk note hrisel tha lakluhna turin ruahmanna siam nghal a ni.

AH & Vety department hnuaia bawng, ar leh sial vulh eizawnna awmze neia kalpui tur leh beneficiary ten an hlawhtlinpui zawk theih nan ruahmanna awm sa siam that leh thlak danglam ngai te pawh vawiina meeting ah hian thlir ho a ni a. Ran vulhtu ten man tlawm zawka ran chaw an lei theih nan AH& Vety department ranchaw siamna atan raw material subsidy pek a, beneficiary ten awlsam zawka ranchaw an lei theihna turin district khawpui zawng zawngah ranchaw hralhna outlet hawng turin ruahmanna siam ni se tih rel a ni.

NLUP record felfai taka hmun khata vawng turin, Radiant Integrity Techno Soulution(RITS) in software changtlung tak a duan chu sawi hovin hei hi IT lam mithiam ten uluk zawka an thlir nawn atan tih a ni a. Hei bakah hian Rubber kaihhnawih eizawnna atana K.G.Mohanan, Addl Ruber Production Commissioner (Rtd) in Rubber based livelihood project for Agriculture and Rural development of Mizoram a buatsaih te, sangha note leh a chaw supply chungchang te, lakhuihthei leh sapthei captive plantation kalpui chungchang te, puantaha eizawngte chawikan na tura ZOHANDCO in NUP a project a thehluh te pawh sawi hovin heng thil atana ruahmannate thlir ho a ni.