Vawiin khan Chief Minister leh NLUP Apex Board Chairman ni bawk Pu Lal Thanhawla hovin a Pisa ah AH & Vety. Department enkawltu Minister Pu Ngunlianchunga, AH & Vety. Department hotulu te leh NIB hotu te chu thukhawmin NLUP-a 3rd leh 4th Phase hnuaia vawk note sem dan tur Department-in a ruahman chu an thlir ho a, ruahmanna chhawpchhuah te chu tha tiin November thla atangin NLUP hnuaia beneficiary a vawk no sem zui leh an rel.

NLUP hnuaia 3rd leh 4th Phase-a, vawk vulh thlangtu beneficiaries te tana vawk note sem leh tur ruahmanna leh he hna kalpuina atana Monitoring Plan AH & Vety. Department-in an siam chu meeting ah hian thlir ho niin ruahmanna an chhawpchhuah chu tha tiin ruahmanna anga kalpui nise tih an rel a. Ruahman ang chuan vawk note sem tur hi tualchhunga vawkpui vulhtu atanga lei nise tiin a theih chin chinah vawk note hi a semna tur khaw hnai atangin lak theih nise tih rel a ni a. He hna hi Village Level NLUP Committee leh District AH & Vety. Officer (DVO) te inrawnkhawmin anni ruahmanna hnuai a sem dan tur leh he hna hi uluk leh fimkhur takin kalpui nise tih rel niin DVO in thla tin he hna kalpui dan hi report nise tih rel a ni a. He ruahmanna kalpui dan hi thla thum hnuah thlir ho leh nise tih an rel bawk.

Meeting ah hian Porcine Respiratory & Reproductive Syndrome (PRRS) chungchang pawh sawi lan niin AH & Vety. Department hotu ten August ni 19 hnuaah PRRS avanga vawk thi report an dawn loh thu sawiin tun dinhmunah chuan vawk sa ei a him thu an sawi a. An sawi dan chuan vawk damlo, hi damdawi an pek atanga ni 21 hnuah chuan a talh theiin a sa pawh mihring tana ei a him thu an sawi a ni.

NLUP 3rd leh 4th Phase ah hian Vawk vulh thlangtu beneficiaries 8206 vel an awm a, anni hi vawk note 6 theuh pek tur a ni a, a thawhkhatnaah a note 3 pek tur niin a thawhhnihnaah a dang 3 pek belh tura ruahman a ni a. NLUP hnuaia vawk note sem hna hi November ni 7 vel atangin tan leh beisei a ni.