Vawiin chawhma khan Sports Minister Pu Zodintluanga chuan Sir Ratan Tata Trust (SRTT), Sarva Sikhsha Abhiyan (SSA) Mizoram leh Mizoram Football Association (MFA) te tangkawpin a buatsaih, ni 4 awh tur 1st Inter-district under-14 grassroots football tournament for boys and girls chu Rajiv Gandhi Stadium, Mualpuiah a hawng.
Football zirlai naupangte hmaah fuihna thu sawiin Pu Zodintluanga Minister, Sports and youth services chuan infiamna leh zirna hi a kal kawp thei ani tih a sawia. Naupangte chu taihmakna, tumruhna leh mahni inthununna kawnga theihtawp chhuah turin a fuih. Minister chuan tunah hian Mizoram Sawrkar leh Ratan Tata Trust te’n thawhhona thatak an nei mek ati a. Centre of Excellence pawh Aizawlah din anih theih nan thawhhona thuthlung (MoU) an buaipui mek ani ati. He Centre of Excellence a football khelh zir chhunzawm tur hian District hrang hranga grassroots football training centre a zir mek naupangte zinga beiseiawm zualte chauh thlan an ni ang tiin District training centre a naupang zir mek te chu an zirlaia rilru pe turin a chah.
Hawnna inkhawm hi Pu Lalhmachhuana, State Project Director Mizoram SSA mission in a kaihruaia. He hunah hian Pu Anand Datla, Head of Sports, Ratan Tata Trust pawh thu sawina hun pek ani a; Jeje Lalpekhlua, Ambassador, SSA-Tata Trusts-MFA Grassroots Football Development Programme in naupangte hnena thuchah a rawn thawn pawh ngaihthlak ho ani.
Report in a tarlan danin tun dinhmunah he programme hi District parukah kalpui mek ani a. Aizawlah centre 14, Lungleiah Centre 12, Champhaiah centre 10, Mamitah Centre-8, Kolasibah Centre-8 leh Serchhipah centre 8 awm mekin heng ah te hian naupang 3000 in Football an zir mek a ni.
