Vawiin khan Chief Minister Pu Lal Thanhawla, NLUP Apex Board Chairman hovin NIB coference hall-ah kum 2014-2015 atana NLUP sum ruahmanna leh line department hrang hrangte sum mamawh dan te thlir ho a ni a. Line department hrang hrang ten NLUP convergence atana Central scheme sum an thawh dan pawh thlir a niin uar zawka convergence kalpuina tur lai te sawi ho a ni.

Chief Minister chuan Mizoram tan NLUP a pawimawhzia sawi nawn lehin he project hi a hlawhtlin phawt chuan hei hian Mizoram mamawh dang tam tak chhanna a kengtel nghal a. Hemi atan hian theihtawp chhuah zui a tul tak zet a ni tiin tun thlenga tluang taka sorkar flagship programme a kal thei chu lawmawm a tih thu a tarlang.

NLUP kalpui zelna ah hmalakna tur pawimawh zualte he meeting ah hian sawiho a ni a. Hemi zingah hian NLUP avanga thlai thar chhuah pung chho mek thlirin he kut hnathawktute tan thlai thar phurh chhuahna tur kawng siam chu NLUP infrastructure dinna ah ngaih pawimawh hmasak ni se, tih a ni a. MIFCO hnuaia sapthei captive plantation kalpuina tura sum mamawh chu Horticulture department kaltlangin a rang thei ang bera pek chhuaah turin tih a ni bawk a. NLUP thlenpui tawh chinah Mizoram dinhmun a nghawng danglam tawh dan zirchiang a, mid-term assessment nei thuai ni se tih a niin hemi atan hian third party agency rintlak ngaihtuah vat tur a ni.

Vawiin meeting ah hian State Planning Board Vice Chairman Pu H. Liansailova leh Pu J.H. Rothuama, NLUP Implementing Board Chairman te bakah Planning Department leh NIB official te an tel a ni.